MUTL Prontu Hafo'er Prado Ho Raan Featured

By INDEPENDENTE Agostu 18, 2017 3581
MUTL MUTL

DILI: Parlamentu Nasionál (PN) laiha ona tempu atu halo alterasaun ba rezolusaun leilaun karreta Prado, tanba enkontru lider bankada no plenária mós remata ona. Ne’e duni, labele halo deliberasaun hodi diskute.

Prezidente Parlamentu Nasionál, Adérito Hugo da Costa hateten, Parlamentu Nasionál apresia no respeitu opiniaun públiku ne'ebé movimentu estudante sira entrega, maibé atu halo alterasaun presiza liu husi deliberasaun plenária.

“Alterasaun ba rezolusaun tenke liu husi deliberasaun plenária nian, maibé ita hatene katak iha segunda semana ne’e plenária ikus ona”, tenik nia, iha Uma Fukun PN, horisehik.

Parlamentu Nasionál iha Kinta (17/8) halo ona konferénsia lider bankada ba dala ikus hodi ensera III Lejizlatura.

Ne’e duni, Adérito dehan, laiha ona atividade atu halo deliberasaun ba kualkér diskusaun. Tanba ne’e, petisaun husi estudante sira nian ne’e sei estuda hodi entrega ba IV Lejizlatura oin mai.

Prontu Hafo'er Prado Mutin Ho Raan

Entretantu, Movimentu Universitáriu Timor Leste (MUTL) hatuur ona desizaun finál ba asaun kontra rezolusaun leilaun karreta Prado ne'ebé parlamentu halo. Tanba ne’e, sira husu atu kansela rezolusaun ne’e molok sira hafo'er Prado ho raan.

“Ha‘u dehan ona ba Prezidente Parlamentu Nasionál atu kansela no hapara prosesu leilaun karreta ne’e, se lae bele mosu asaun ida boot liután”, dehan Portavós MUTL, Miguel Arcanjo, bainhira halo asaun Pasífiku iha Parlamentu Nasionál oin, horisehik.

Nia esplika, PN la konsidera asaun husi MUTL nian mak sei bele mosu akontesimentu seluk ne'ebé sei fila-fali mundu nia matan mai Timor ho trajédia fakar raan. Kuandu na’i ulun sira obriga sei mosu revolusaun arma. Tan ne’e, MUTL prontu ona atu simu konsekuénsia husi mentalidade no fizikamente.

Miguel hatutan, asaun ne’e halo atu fokit tradisaun aat ne'ebé Parlamentu Nasionál adopta ona hahú kedas husi inisiu. Nune’e, tempu badak la rezolve prontu hafo'er Prado ho raan.

Polisia Husu Tuir Sirkunstánsia Asaun

Nune’e, Polisia Nasionál Timor Leste (PNTL) apela nafatin ba MUTL atu halo asaun asaun pasifika tenke tuir prosedimentu legál iha sirkunstánsia bainhira halo violénsia polisia sei foti desizaun tuir dalan legál.

Segundu Komandante PNTL Munisípiu Dili, Superintendente Asistente Euclides Belo hatete, asaun ne’ebé MUTL sira halo PNTL prontu garante seguransa, maibé labele perturba orden publika.

Apela mós katak iha bainhira la tuir prosedimentu legál PNTL rasik sei foti asaun forte ba asaun ne’e. Bainhira halo asaun tenke haree mós ba serimónia nasionál, Estadu realiza serimónia labele halo asaun.

“Ami halo seguransa haree mós baze legál no mós sirkunstánsia asaun ne’ebé sira halo,” tenik nia.

Tanba ne’e, Komandu PNTL Dili mós husu MUTL sira tenke koordena malu ho autoridade seguransa liuliu polisia sira hodi labele perturba orden publika.

Relasiona mosu dezentendimentu iha estudante balun doko portaun Parlamentu nian, nia dehan, situasaun ne’e normál.

Mosu Engarrafamentu

Entretantu, asaun ne’ebé MUTL halo ne’e mosu engarrafamentu, maibé movimentu estudante sira koordena ho polisia hodi organiza malu kontrola movimentu transporte.

Segundu Komandante PNTL Munisípiu Dili, Superintendente Asistente Euclides Belo hatete, presiza halo koordenasaun entre Polisia ho MUTL atu labele iha perturbusaun iha fatin públiku.

 

Rate this item
(0 votes)

Independente Digital TV