Objetivu hari sentru amizavél ne’e atu halo akompañamentu ba labarik sira iha situasaun dezastre naturál ne’ebé halo familia barak mak hanoin barak no trauma.

“Entaun ita presiza halo akompañamentu ba sira hodi bele normaliza fila fali sira nia situasaun trauma ne’e”, dehan Diretór Jerál MSSI ba Online Independente iha knar fatin, Kaikoli, kinta ohin (29/04).

Tanba ne’e, MSSI hamutuk ho parseiru dezenvolvimentu sira nafatin iha Protesaun Sivil nia kotuk hodi fó atendementu ba vitima dezastre naturál sira.

Sentru amizavél 13 mak hanesan, Don.Bosko Komoro, Igreja Parokia Hera, Padre Kanosiano Hera, Salaun Parokia Balide, Madre SBSS Hera, São João Paulo Tasi-Tolu, UNTL-Liceu, Ospital Lahane, Infordepe, Kapela Bekari Metiaut, Eskola Sekundaria 4 de Setembro UNAMET-Balide no EBF 12 de outubro Tasi-Tolu.

Sentru amizavél sira ne’e atu asegura mós labarik sira ne’ebé hetan trauma husi akontesimentu ne’e.

Sentru sira ne’e bainhira taka hafoin vitima sira re-intrega hotu ona ba sira nia hela fatin.

 Nune’e nia dehan sentru amigavel ida iha Hera atu taka ona tanba familia vitima sira atu re-integra ona ba nia hela fatin.

Entretanto iha sorin seluk, Kordenador CFS ba grupo 4 ho 6 iha espasu amigavel iha eskola sekundaria 4 de Setembru UNAMET-Balide, Joãozinho Noronha hatete, espasu amigavel ida ne’e ba labarik sira ne’ebé ses husi sira nia hela fatin tanba inundasun.

Iha sentru amizavél ida ne’e servisu hamutuk ho UNICEF no parseiru sira hodi hala’o espasu amigavel ba labarik sira hodi anima sira atu halo atividade hanesan, pinta, hakerek no halimar hodi halakon trauma husi labarik sira.

Nia hatutan, kada grupu iha labarik 20 kompostu husi labarik tinan 0 to’o mai menus husi tinan 18.

Jornalista:Saturnina da Costa

Editor:Jose Sarito Amaral