Diretór Jerál Servisu Korporativus iha MSSI, Fernando dos Reis hatete, husi montante orsamentu ne’ebé maka Ministeriu Solidariedade Sosial no Inklusaun (MSSI) hetan iha tinan ida ne’e, gasta ona $14 resin ho ekivalente 54.12%, husi montante orsamentu $26.188.602.00.

“Iha tinan ida ne'e ita gasta ona orsamentu montante milaun $14.172.161.18, entaun ida ne’e maka ita gasta to'o iha terseiru trimester no sei falta milaun $12,”dehan nia ba Online INDEPENDENTE iha nia knar fatin, MSSI, Kaikoli, Dili, Kuarta ne’e (22/10).

Nia dehan, orsamentu milaun $14 resin ne’e ezekuta ona ba iha pagamentu programa bolsa da mãe kondisional faze dahuluk nian ba benifisiariu na’in rihun 40 resin iha teritoriu laran tomak.

Aliende ne’e mós hodi sosa kareta funerariu haat, apoia aihan ba familia vulneravel sira no mós konstrusaun harii edifsiu iha Ataúro, Suai, Likisa no Bobonaro.

Nia hatutan, agora hela milaun $12, maibé orsamentu hirak ne’e MSSI aloka ona ba iha pagamentu bolsa da mãe kondisional faze daruak nian no mós transferensia ba fundus transferensia publika ba ai-han nutritivu, ne’ebé prosesu la’o hela.

Nune’e, iha trimester ida ikus ne'e sei falta 45.88% ne'ebé kategoria ba iha orsamentu milaun $12.

Tanba ne’e, Diretór Jerál ne’e garante katak to’o iha fulan-Dezembru tinan ne’e ezekusaun bele atinji to’o 99%.