Diretór Jerál Ministériu Solidariedade Sosiál no Inkluzaun, Florencio Pina Dias Gonzaga hatete, programa Bolsa da Mãe Kondisionál apoiu ba ema vulneravel sira nia oan sira-nia eskola  husi tinan 6 to'o 17, inklui labarik ho kondisaun defisiénsia.

“Lei Bolsa da Mãe Kondisionál, Konsellu Ministru aprova ona no publiku tiha ona, orsamentu bele iha mudansa, bainhira labarik ida eskola iha primaria sei hetan subsídiu $8, pre-sekundaria hetan $9 no Sekundaria $10 kada fulan ida,” Dehan Diretór Jerál Ministériu Solidariedade Sosiál no Inkluzaun, Florencio ba Jornalista sira, iha salaun Otél Vila-verde, Kuarta (31/1) .

Florencio dehan, bainhira identifika labarik ida-ne'e ho kondisaun defisiensia asesu ba Eskola, sei aumenta $5 kona-ba Bolsa da Mãe Kondisional, subsídiu  ba labarik kondisaun defisiénsia Eskola primaria hetan subsidiu $13, Pre-sekundaria $14 no Sekundaria $15.

“Governu kria dekreitu-lei númeru 25/2017 kona-ba apoiu MSSI, tanbá ne'e ita iha instituisaun defisiensia 7 hetan rejista ho rezesiamentu,” Nia informa.

Nia informa, Tinan-tinan MSSI aloka fundus bazeia sira-nia proposta, bainhira sira hatama proposta MSSI sei debate no diskute to'o final ho total orsamentu hira foin aloka ba sira.

Nia subliña, iha instituisaun defisiensia sira rekomenda Ema ho Defisiénsia hira mak asesu no agora iha mudansa ona, tanbá iha polítika governu ida ne'e kona-ba subsídiu hodi apoiu ba Ema ho Defisiénsia sira.

“MSSI sei esforsu implementasaun programa liu husi parseriu sira hotu, atu involve no partisipasaun kona-ba kondisaun Ema ho Defisiénsia sira sai importante,” Nia relata.

Nia afirma, programa hot-hotu temi ba Ema ho Defisiénsia no Bolsa da Mãe Kondisional sei halo identifikasaun,  iha tinan 2023 husi MSSI aloka orsamentu ho montante $8,820 ba benefisariu hamutuk 147.

“Bolsa da Mãe Kondisionál, ha'u konfirma katak posibilidade halo mudansa  tanbá foin lalais ami ajustamentu signifika sei identifika benefisariu foun iha munisipiu sira,” Nia haktuir.

Nia reforsa, tanbá ne'e, fámilia balun nia oan ho kondisaun defisiénsia tinan hirak liu ba seidauk eskola,  maibé dala-ruma tinan ida ne'e sira tama fali  eskola Primaria, entaun sira elizivel asesu ba  Bolsa da Mãe Kondisionál.

“Labarik kondisaun defisiénsia asesu ba  Bolsa da Mãe Kondisionál, iha tinan ida-ne'e  sei tau orsamentu ho montante rihun $12, husi Diresaun Nasional Espesifiku tau matan ba Ema ho Defisiensia iha MSSI,” Tenik nia.

Nia fundamenta, iha tinan 2024 Governu liu husi MSSI aloka sira nia orsamentu montante rihun $192 sei utiliza ba aktividade hotu ligadu ho asuntu defisiénsia ninian.