Ministru Obras Publiku, Samuel Marçal hatete, governu preve ona orsamentu ba komunidade sira iha area Bebonuk ne'ebé afeta ba projetu rehabilitasaun estrada.

"Sira halo ona negosiasaun (Abitante Afetadu), balun konkorda ona no agora ita hein selu indemizasaun para konstrusaun bele la’o ona,"dehan Samuel Marçal ba Jornalista INDEPENDENTE iha Edifisiu IGEADI, Kolmera, (13/10).

Maske Ministru la lembra montante orsamentu, maibé governu preve ona atu halo indeminizasaun, tanba preokupasaun husi komunidade afetadu sira halo projetu ne'e labele la’o iha tinan barak nia laran.

Tuir Relatoriu ne'ebé ekipa tekniku sira aprezenta, komunidade barak mak konkorda ona atu selu indeminizasaun tanba kooperasaun di'ak ho governu.

Molok ne'e, Ministru Obras Publiku sesante, Abel Pires orienta ekipa tekniku sira atu halo koordenasaun ho autoridade lokal hodi indemiza abitante sira, maibe laiha solusaun nafatin.