Tuir planu, lista ne’e indultu ne’e sei oferese ba dadur na’in 40 iha loron Restaurasaun Independensia, iha 20 Maiu 2026.

Ministru Justisa, Sérgio Hornai hatete, lista ne’e inklui kondenadu sira ne’ebé iha kondisaun legál no umanitáriu atu hetan konsiderasaun, inklui mós sira ne’ebé hatudu komportamentu di’ak iha prizaun no iha idade avansadu.

“Ita halo ona submisaun ba iha Súa Exelénsia Prezidente Repúblika. Dezde prinsípiu iha tinan kotuk mós ita hato’o ona, no ohin sira ne’ebé mak seidauk hetan direitu ba komutasaun pena no mós indultu nian ita halo nafatin submisaun bazeia ba iha proposta sira ne’ebé mai husi benefisiáriu, liuliu interesadu sira," dehan nia ba Jornalista sira, iha Palasiu Governu, Kuarta (13/05).

Nia esplika, iha mekanizmu rua mak sai hanesan baze ba konsiderasaun: indultu no komutasaun pena. Proposta sira mai la’os de’it husi benefisiáriu sira, maibé mós husi família, reprezentante legal, no mós husi kanál diplomátiku sira husi estranjeiru.

Tuir Ministru, prioridade governu nian mak ba sidadaun sira ne’ebé kumpre ona kondisaun iha prizaun, liuliu sira ne’ebé iha prizaun Gleno.

Nia hatutan, prosesu ne’e mós konsidera fatór umanitáriu, hanesan komportamentu iha prizaun, idade avansadu, no situasaun saúde.

“Tanba kondenadu sira komportamentu di’ak, kolobora di’ak. Seluk hanesan ninia idade avansadu ona, ita laiha pena perpetua iha ne’ebá, entaun ha’u hanoin ita-boot sira halo ezersisiu oinsa atu bele paixaun ida umanitaria. Se ema idade fó biban ba nia atu bele hamutuk ho nia família,” dehan nia.

Kona-ba eis Padre Richard Daschbach, Ministru ne’e dehan, tanba nia mós ema ne’ebé idade ona governu hato’o hela informasaun ne’e, maibé kompetesia propria iha Prezidente Repúblika nian atu tetu.

“Lista podeser inklui eis padre Richard Daschbach. Em prinsipio tanba nia mós idade avansadu tama hotu lista ne’e,” katak nia