Ho nune’e, iha misa agradesementu ne’e, Sua Eminência Reverendissima Kardeál Dom Virgílio do Carmo da Silva, husu ba sarani sira atu reza ba nia ba knar foun ne’ebé nia simu.
“Husu ita boot sira atu reza nafatin no mós reza mai ha’u ne’ebé simu knar ida ne’ebé, bainhira ita bo’ot sira haree iha media iha jestu oi-oin, maibé ha’u hakarak atu mensiona deit jestu rua ne’ebé iha loron nomeiasaun nian ne’e, ho faze ida iha korajen mós ba iha misaun,”dehan nia iha ómilia, tersa ne’e (06/09).
Nune’e, iha nia ómilia ne’e Kardeál, hatutan, Maromak nia fuan ne’ebé kontinua hanorin mai ba saran sira, konvida mós atu buka maneira foun oinsa atu bele promove dame no domin iha sosiedade ne’ebé dala ruma mosu violensia oi-oin ne’ebé buras iha nia leet.
“Ha’u hanoin ida ne’e mak ita hotu nia vokasaun no Maromak bolu la’os bolu deit apostulo sira ne’ebé iha rihun rua resin rua nulu liu ba ne’e. Ohin nia renova ita hirak ne’ebé iha ne’e, la’os deit bolu ha’u ne’ebé ho knar nuudar Kardeál ninian, hanesan ha’u dehan fila-fila, prezente ne’e fó ba ita hotu,”dehan Kardeál
Oportunidade ida, atu sarani sira hotu ne’ebé halibur hamutuk iha ne’e atu koko, la’o hamutuk sa’e ba Na’in nia foho, ida mak bele iha duni esperensia Maromak nian iha aldeia no sosiedade laran.
Nune’e. sarani hotu ne’ebé iha ne’e, no ema sira ne’ebé rona hela mensajen ne’e, tau iha neon konvite Maromak nian no mai sa’e ba Na’in nia foho.
Atu nune’e, presiza korajen atu husik atetudi no komportamentu ne’ebé la’os saudavel, komportamentu ne’ebé la’os mai atu konstrui maibé atu sobu, hamate no falun kultura moris nian.
Kardeál haktuir, Chapeu mean ne’ebé Amu Papa tula ba Kardeál nia ulun ne’e la’o dekorasi, maibé ida ne’e knaar no responsabilidade bo’ot ida.
Kardeál dehan, bainhira Amu Papa tula Chapeu mean iha Kardeál sira nia ulun, Amu Papa dehan, “ba maromak ida ne’ebé ass liu hotu nia gloria no onhra, sede apostolika simu ba birreta mean ne’e mak sinal dignidade kardeál nian”.
Enkuantu, tuir observasaun husi Online INDEPENDENTE, iha terenu nota katak, sarani sira ne’ebé partisipa iha misa agradesementu ne’e, maizumenus rihun rua resin, husi Dioseze tolu hanesan, Baukau, Maliana no Dili.
Nune’e, mós inklui madre, padre, estudante no mós seguransa sira hanesan PNTL, F-FDTL, UEP.
Aleinde, iha mós Primeiru Ministru Taur Matan Ruak, membru oitavu Governu konstituisional sira hanesan, Ministru Administrasaun Estatal, Miguel Pererira de Carvalho, Ministru Prezidensial Konsellu Ministrus Fidelis Leite Magalhães, inklui mós sira seluk, membru Parlamentu Nasional, Korpu Diplomátiku no mós Prezidente Konferénsia Episkopál Timor-Leste (CET, siglá portugés), Bispu Dom Norberto Amaral.
Entretantu, tuir oráriu santa misa hahú iha tuku 16:00 to’o 18:00 otl no hafoin misa ramata sei iha diskursu hosi Primeiru Ministru (PM), Taur Matan Ruak, Prezidente Konferénsia Episkopál Timor-Leste (CET, siglá portugés), Bispu Don Norberto Amaral.
Nune’e mós sei iha sesaun hasai retratu ka fotográfia hamutuk ho Sua Eminência Reverendissima Kardeál Dom Vigílio do Carmo da Silva, SDB ho direjente igreja nian no konvidadu sira, depois ne’e sei iha jantár konfraternizasaun, no ba ajenda ikus mak taka ho konsertu múzika espirituál.
Enkuantu, misa agradesementu ne’e hetan seguransa másimu husi eskuteiru igreja, grupu THS-THM no membru Polísia Nasionál Timor-Leste (PNTL) no mós membru F-FDTL no UEP-BOP.
