Ministru Eduksaun Armindo Maia hatete, MEJD deside konsentra eskola hotu-hotu hahú husi Pre-Primaria to'o Sekundaria iha eskola Sekundáriu Jeral (ESJ) 4 de Setembru UNAMET Balide hodi halo abrtura ba prosesu ensinu aprendizajem tinan 2023.
"Seremonia abertura ohin ba prosesu aprendizajen ba tinan 2023, tinan ida ne'e, ita deside konsentra iha ESJ 04 de Setembru Balide i ita hala'o iha loron 16 Janeiru antes loron rua kompara ho tinan kotuk, tanba tinan kotuk hala'o iha 18 Janeiru 2022,”dehan nia iha ESJ 04 de Setembru, Balide, segunda ne’e (16/01).
Governante ne’e hatutan, ho abertura ne'e eskola hotu bele hahú ona prosesu tomak hanesan posesu aprendizajem durante tinan ida nia laran no espera katak buat hotu preparadu.
"Ita espera katak buat hotu-hotu preparadu no la'o ho di'ak, nune'e eskola hotu bele hahú ensinu aprendizajen iha tempu badak," nia informa.
Iha fatin hanesan, Diretór Edukasaun Munisipiu Dili, Carlito da Silva, hatete, ba dirijente eskola sira hotu atu organiza eskola hotu ho disiplina atu nune'e prosesu hotu bele la'o ho di'ak.
"Ohin halibur malu iha fatin ne'e ho objetivu ida importante tebes ba futuru nasaun Timor-Leste nian, tanba ita hotu senti katak edukasaun ne'e importante mak ema hotu ne'ebé tama iha eskola ida, ba futuru garante iha ona kualidade," nia hakotu.
