MEJD Autoriza Reativa ESTV Bekora Featured

By Elsa Belinha Juñu 18, 2020 3447
Eskola Sekundáriu Tekniku Vokasional (ESTV) Bekora. Foto Gab. MEJD Eskola Sekundáriu Tekniku Vokasional (ESTV) Bekora. Foto Gab. MEJD

DILI: Ministériu Edukasaun, Juventude no Desportu (MEJD) deside hodi autoriza Eskola Sekundáriu Tekniku Vokasional (ESTV) Bekora hodi reativa prosesu aprendizajen tanba eskola refere priense ona kritéria husi Ministériu Saúde (MS).

Ministra Edukasaun, Juventude no Desportu Dulce de Jesus Soares hatete, MEJD hamutuk ho MS halo observasaun ba ESTV Bekora hodi halo observasaun atu sira bele reativa ona sira-nia prosesu aprendizajen prezensial.

“Tuir checklist ne’e iha item 7 mak tenke prienxe tanba ne’e sira prienxe tiha ona no tanba ne’e husu ba MEJD no MS atu halo observasaun hodi sira reativa ona sira-nia prosesu aprendizajen prezensial,” dehan nia iha ESTV Bekora, Kuarta (17/06).

Atu bele reativa eskola, MEJD fó kriteria hitu (7) ba kada eskola atu tenke kumpre, mak hanesan: (1) Iha asesu ba bee no maneira atu hamoos eskola lorloron; (2) Eskola iha fatin fase liman assesivel ba sala de aula idaidak, ho bee no sabaun no/ka hand sanitizer iha sala de aula ida idak; (3) Eskola iha fatin atu soe foer ho seguru; (4) Dirijente eskolar tuir ona no passa teste husi treinamentu ida ne’e kona-ba Covid-19 (MEJD sei verifika); (5) Edukador no Estudante sira uza maskra; (6) Informasaun kona ba Covid-19 taka iha fatin ne’ebé ema hotu bele haree ho fasil; (7) Eskola preparadu atu pratika distansiamentu sosial tuir regra ne’ebe fó sai husi MEJD.

Ba ESTV Bekora, Ministra ne’e dehan, konsege priense ona kriteria 7 tan ne’e sira bele ona reativa eskola.

“Ohin ami sosializa katak eskola ida ne’e bele loke ona sira-nia prosesu aprendizajen prezensial.”

Ministra ne’e hatete, MEJD serbisu hamutuk ho doador sira esforsu atu kompleta material ijénika no ekipamentu sira seluk atu eskola sira seluk mós bele reativa.

“MEJD loke eskola fazeadamente, labele fó data fixu ida atu reativa tanba eskola barak seidauk kompleta maibé Diretór eskola sira tenke esforsu hodi kompleta rekezitus sira ne’e.”

“Bainhira eskola balun la halo esforsu hodi kompleta, Inspesaun Jeral sei fó sansaun ba diretor eskola sira tanba MEJD fó ona flexibilidade uza orsamentu konsesoens eskolares iha fulan 3 nia laran la uza ne’e permite eskola sira atu uza orsamentu ne’e sosa bee no sabaun no mós sosa maskara,” dehan Ministra Dulce.

Iha fatin hanesan, Diretór ESTV Francisco Guterres hatete, maske kriteria ne’e sira priense ona, maibé sira sei halo mudansa ba prezensa estudante sira nian iha sala de aula.

Tanba, nia dehan, molok implementasaun estadu emerjensia estudante sira ne’ebé tuir prosesu aprendizajen iha aula ida minimu liu mak na’in 25 no maximu na’in 35.

“Tanba ne’e sei reduz ba kada sala ema na’in 20, entaun atu asegura atividade prosesu aprendizajen prezensial ne’e fahe orariu hanesan loron 2 ba primeiru ano, loron 2 ba segundo ano no loron 2 ba terceiro ano,” dehan nia.

Entretantu, ESTV Bekora iha Departamentu 6 no turma hamutuk 36 no total estudante na’in 1.034.

Entretantu, molok ne’e, Diretór Edukasaun Munisipiu Lautem, Rogilio da Silva hatete, iha Estadu Emerjensia datoluk ne’e nia parte simu informasaun husi MEJD katak atu reativa atividade aprendizajen iha eskola sira tenke priense kriteriu sira ne’ebe Ministeiru Edukasaun fó sai.

Maibé, Rogilio dehan, iha Lautem iha preokupasaun boot tebes kona-ba bee, tanba maioria eskola sira iha Munisipiu ne’e seidauk hetan asesu ba bee-moos.

“Ita sei hein hela tulun husi doador sira ne’ebé maka serbisu hamutuk ho MEJD atu oinsa mak bele fasilita bee ba eskola sira,” dehan nia iha nia knar fatin, Segunda (15/06).

Maske hasoru difikuldade, maibé, Rogilio dehan, daudauk ne’e parte Edukasaun Munisipiu Lautem esforsu namanas hodi buka atu priense kriteriu sira ne’ebé MEJD fó sai ona hodi bele reativa atividae aprendizajen iha Eskola.

“Agora dadaun ami esforsu hela hodi koopera ho Bombeiros no SAS munisipiu nian oinsa atu bele fornese bee ba eskola sira no ami mós sei hein nafatin apoiu husi UNICEF nian ne’ebe serbisu hamutuk ho MEJD atu fornese tanke no sabaun fase liman nian ba eskola sira, maske defisil mais ami esforsu nafatin atu ita-nia oan sira bele eskola fila fali,”  dehan nia.

Tuir dadus, eskola ne’ebé eziste iha munisipiu Lautem hamutuk 130 ne’ebé kompostu husi Pre-Eskolar, Ensinu Primariu, Pre-Sekundaria, Sekundaria no Tekniku Vokasional.

Entretantu, Diretor Edukasun ne’e informa, bazeia ba orientasaun husi MEJD, durante implementasaun EE, edukasaun munisipiu sira tenke halo orariu traballu ba professor sira liu husi gabinete diretiva hodi fahe mestre sira atu mai engrupu hodi hein estudante sira iha atu fahe livru no rezumu.

“Mestre sira iha ne’eba troka malu hein labarik sira fahe livrus no fahe rezumu, maske durante EE maibé edukasaun liu Funsaun Publika fahe orariu ba professor sira hodi atende estudante sira ne’e lao hela,” dehan nia.

Rate this item
(0 votes)

Independente Digital TV