Diretór Jerál Edukasaun Pre-eskolar, Ensinu Báziku no Ensinu Rekorente, Apolinário Serpa Rosa hatete, Ministériu Edukasaun (ME) iha tinan ne'e distribui fasilidade ba ensinu báziku sira hodi bele fasilita servisu sira iha eskola.
"Ministériu Edukasaun iha tinan ida ne'e distribui fasilidade sira ba ensinu báziku sira iha teritóriu tomak, no fasilidade hirak ne'e mak hanesan motorizada ho komputadór hamutuk 193, no ita sei distribui iha fulan-oin iha semana primeiru no semana segundu," dehan Diretór Jerál, Apolinário Serpa iha nia knaar fatin, Vila-Verde, Segunda (18/03).
Nia informa, tuir loloos Ministra Edukasaun, halo ona lansamentu ba distribuisaun hirak ne'e iha semana ida ne'e, maibé labele, no muda fali ba fulan oin, tanba Ministra Edukasaun sei viajen ba rai li'ur iha semana ne'e inklui hein ho dokumentu ne'ebé sei trata iha Diresaun Nasionál Tranporte Terrestre (DNTT).
"Loron ne'e ita distribui iha fulan ida ne'e, maibé ami konfirma ba Diresaun Nasionál Lojistika ne'ebé mak trata dokumentu sira ne'e dehan iha dokumentu balun ne'ebé ita halo hotu lai tanba motor barak, no dokumentu hirak ne'e sei trata hela iha DNTT, inklui ita hein ministra fila husi viajen ba rai li'ur lai, tanba nia mak sei halo abertura ba distribuisaun ne'e rasik," nia informa.
Nia hatutan, fasilidade hirak ne'e sei distribui ba eskola ensinu báziku hamutuk 193 ne'ebé eziste iha teritoriu tomak, la inklui RAEOA Oé-cusse. Portantu kada eskola hetan motorizada no komputadór ida, enkuantu motorizada ne'e atu subtitui fali motorizada sira ne'ebé mak eskola sira hetan iha tinan 2012.
"Tanba motorizada hirak ne'ebé hetan iha tinan 2012 ne'e barak mak avaria hotu ona no tama ona iha lelaun i nune'e mak ita atu fó fila fali motorizada foun ida para hodi bele fasilita sira-nia servisu, uza hodi tuir atividade sira iha munisípiu, no ensinu báziku hamutuk 193 mak sei hetan fasilidade hirak ne'e," nia esplika.
Nia informa, motorizada hirak ne'e la'ós atu oferese ba diretór ensinu báziku, maibé ba operasionalizasaun ensinu báziku nia, signifika eskola nia no sira uza hodi hala'o servisu hotu iha ensinu báziku sentrál to’o ba nia filiál sira.