ME rekoñese eskola katólika barak seidauk hetan merenda eskolár Featured

By Cesarina de Carvalho Abril 18, 2024 198
Ministra Edukasaun (ME), Dulce de Jesus. Foto:Dok. Ministra Edukasaun (ME), Dulce de Jesus. Foto:Dok.

DILI: Ministra Edukasaun (ME), Dulce de Jesus hatete, loos duni katak eskola katólika dadaun ne'e barak mak seidauk asesu ba merenda eskolár.

"Sim, too ohin loron eskola Katólika barak mak seidauk simu merenda eskolár ne'e rasik. Tanba ne'e ita diskute oinsá ba oin atu implementa programa merenda eskolár ba iha eskola katólika sira ne'ebé seidauk hetan. Klaru katak, programa merenda eskolár ne'e Ministériu Administrasaun Estatál (MAE) mak responsavel, maibé emtermus estudante sira ne'e tutela ba Ministériu Edukasaun (ME), tanba ne'e sira iha responsável atu servisu hamutuk ho Konsellu Nasionál Edukasaun Katólika Timor Leste (KONEKTIL) hodi foti dadus estudante sira nian, ho nune'e bele koopera ho MAE oinsá buka solusaun ba kestaun ne'e," Dehan Ministra Dulce, hafoin hasoru malu ho Reprezentante Santa Sé iha Timor-Leste, Monseñór Marco Sprizzi, iha Villa-Verde, ne'ebé INDEPENDENTE asesu iha Kuarta (17/04).

Ministra Dulce haktuir, daudauk ne'e ME iha hela prosesu halo revizaun ba kuríkulu husi ensinu báziku 3º siklu no sekundária, sira hahú haree oinsá enkaixa matéria kona-ba dokumentu Fraternidade Umana.

"Ita agradese tanba KONEKTIL realiza ona no enkaixe ona matéria dokumentu Fraternidade Umana hanesan matéria relijiaun ba 10º ano ne'e inklui ona matéria kona-ba karta Episcopal sira hanesan Fratteli Tutti, Laudato Si, tama tiha ona iha livru referénsia balun, ho nune'e ME sei reforsa liután de'it," dehan ministra.

Purtantu reprezentante Santa Sé iha Timor-Leste, Monseñór Marco Sprizzi, hatete, nia hasoru ona ME hodi diskute kona-bá planu Ministériu nian liga ba implementasaun programa merenda eskolár ba eskola katólika sira ne'ebé seidauk implementa.

"Programa ida ne'e importante tebes atu estudante hotu iha territóriu laran bele asesu ba programa ne'e rasik, tamba sira hotu iha direitu hanesan," dehan Reprezentante Santa Sé, Monseñór Marco.

Aléinde ne'e mós ko'alia ho ME oinsá atu implementa dokumentu Fraternidade Umana no oinsá atu empeña iha kurríkulu nasionál iha eskola sira.

"Ami diskute mós diskuti ona kona-bá dokumentu Fraternidade Umana ne'ebé Parlamentu TL assume hanesan dokumentu nasionál ho ME inklui KONEKTIL, órgaun kompetente Episcopal hodi empeña iha kuríkulu, nune'e estudante sira bele moris ho espíritu fraternidade," dehan nia.

Rate this item
(0 votes)

Independente Digital TV

Tuir ami iha Twitter

Kalendariu Notisia

« May 2024 »
Mon Tue Wed Thu Fri Sat Sun
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31