Enkontru ne’e realiza tuir inisiativa husi Prezidenti Autoridade Munisípiu Dili, atu halo koordenasaun servisu ho Diresaun-Jerál Komérsiu, liu husi akompañamentu ba informasaun ne’ebé publika ona iha média kona-ba alokasaun orsamentu husi MCI ba estudu no planeamentu dezenvolvimentu ba merkadu rua ne’e.

Durante reuniaun, parte rua konsidera katak koordenasaun, entre instituisaun sira importante tebes atu asegura prosesu planeamentu no toma desizaun ne’ebé inkluzivu, no responde ba nesesidade komunidade. Nune’e, Autoridade Munisípiu Dili, sei envolve iha prosesu apresentasaun relatóriu final husi konsultór sira, ne’ebé planeia atu realiza iha semana ida-ne’e nia laran.

Diretór Jerál Komérsiu, Elias de Jesus Fátima hatete, partisipasaun Autoridade Munisípiu Dili iha aprezentsaun final importante atu bele fó kontribuisaun, rekomendasaun no perspetiva lokál sira ba proposta dezenvolvimentu ne’ebé prepara husi ekipa konsultór.

“Ida-ne’e sei kontribui ba rezultadu estudu ne’ebé mais komprensivu no aliñadu ho realidade no prioridade munisípiu nian,” Dehan nia liu husi komunikadu ne’ebé Online INDEPENDENTE asesu, Tersa (16/06).

MCI mos reafirma katak durante períodu ida-ne’e, jestaun no administrasaun merkadu sira kontinua sai responsabilidade Autoridade Munisípiu Dili. Papel MCI mak prepara no fasilita prosesu konstrusaun infraestrutura fízika, enkuantu operasaun, manajementu no kontrolu merkadu sira sei permanece iha responsabilidade autoridade lokál, partikularmente Autoridade Munisípiu Dili.

Nune’e, liu husi kooperasaun no koordenasaun ne’e, espera katak projetu dezenvolvimentu Merkadu Taibesi no Manleuana bele responde di’ak liu ba nesesidade comerciantes no konsumidores, hodi kontribui ba fortalese atividade ekonómika no dezenvolvimentu komérsiu iha Munisípiu Dili.