Maiu, ME Loke Bolsa Kandidatu Profesór Faze Daruak Featured

By Cesarina de Carvalho Abril 24, 2024 308
Kandidatu ba Bolsa kandidata tuir teste elektorniku iha CFP, Matadoru, Dili, Foin lalais ne'e. Foto:Dok. Kandidatu ba Bolsa kandidata tuir teste elektorniku iha CFP, Matadoru, Dili, Foin lalais ne'e. Foto:Dok.

DILI: Portavós Gabinete Ministra Edukasaun (ME), Filipe Rodrigues Pereira hateten, posibilidade Ministériu Edukasaun loke vaga bolsa kandidatu profesór nian iha fulan-Maiu ne'e.

"Faze daruak ba bolsa kandidatu profesór Ministériu Edukasaun sei koordena ho Komisaun Funsaun Públika hodi loke vaga. Maibé agora haree uluk lai pre-eskolár no ensinu báziku nia ne'e. Espera iha fulan oin nia-laran ne'e rejistu ba segundu faze ba sira ne'ebé mak sei hakarak atu mai kompete depois rejistu hotu, sei tuir kedas ho teste sira-ne'e," dehan nia, iha knaar fatin, Vila Verde, horisehik.

Tanba ne'e, nia dehan, kuandu fó sai vaga, profesór hotu-hotu ne'ebé iha interesse bele konkore no nia rekezitu hanesan ho anteriór inklui nafatin uza teste eletróniku.

"Ida-ne'e ita sei prosesa fazeadamente maibé ita sei prioritiza ba bolsa kandidatu profesór ba ensinu báziku. Depois mak ba vaga ensinu sekundáriu jerál nian, tanba ita sei hein quadro pessoal ba identifikasaun eskola sira hafoin loke ba públiku," dehan Filipe.

Entretantu, Diretora Nasionál Rekursu Umanu, Anita Tavares hateten, kandidatu Profesór ne'ebé pasa iha teste eskrita hamutuk 568, ne'e seidauk tuir tarjetu lugares 2.400 hosi Ministériu Edukasaun nian. Ho ida-ne'e Ministériu Edukasaun hetan autorizasaun husi Konselu Ministru (KM) hodi loke fila-fali vaga bolsa kandidatu profesór ba faze daruak hodi bele kompleta tarjetu ne'ebé iha.

"Ita sei halo preparasaun no halo oráriu ida hodi prepara loke fila-fali  bolsa kandidatu profesór ba faze daruak ne'e.  Ita tenke halo ida-ne'e maibé  ami seidauk halo oráriu. Ha'u hanoin iha tempu badak, maibe ita tenkeser preparadu.  Ha'u hanoin ida-ne'e ita sei fila-fali faze segundu para kompleta ba  iha lugares ne'ebé ke previstu Ministériu Edukasaun halo ona. Ita sei halo avaliasaun no ita hotu haree fila-fali.  Tanba ida-ne'e mak presiza tempu ida ekipa tuur hamutuk atu halo avaliasaun, nune'e haree. Ha'u hanoin matéria sira-ne'e ohin, ha'u fó sai ona, katak kandidatu sira mós tenke prepara-an", diretora dehan.

Entretantu ligadu ho kolokasaun profesór Ministra Edukasaun orienta ona rekursu umanu atu servisu hamutuk ho Ministériu Administrasaun Estatál atu oinsá prosesa rapidamente ba kandidatu ne'ebé hetan klarifikasaun iha bolsa kandidatu profesór.

Rate this item
(0 votes)

Independente Digital TV

Tuir ami iha Twitter

Kalendariu Notisia

« May 2024 »
Mon Tue Wed Thu Fri Sat Sun
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31