MAE Transfere Ona $800.000 ba Programa Merenda Eskolár iha Baucau

By Adelaide dos Santos Setembru 17, 2021 452
Alunus sira hetan ona meranda eskolar. Foto:INDEPENDENTE. Alunus sira hetan ona meranda eskolar. Foto:INDEPENDENTE.

Diretór Servisu Edukasaun Munisípiu Baucau, Augusto Hornai, hateten durante nee MAE transfere ona osan ba programa nee iha sira-nia konta bankária hamutuk $800.000, no husi Orsamentu nee sira ezekuta ona $26.000.

“Ita ezekuta ona $26.000 ba implementasaun programa merenda eskolár-nian ba tinannee. Ita iha hela $774.000 mak seidauk ezekuta, tanba situasaun serka sanitária,” nia hateten via telephone, Kinta (16/09).

Montante $774.000 too agora seidauk ezekuta tanba implementasaun programa merenda eskolár paradu durante fulan haat, hahú husi fulan marsu too fulan  jullu, nunee iha fulan agostu, sira implementa deit loron lima tanba sira iha situasaun serka sanitária.

Iha tinan nee implementasaun programa merenda eskolár iha munisípiu Baucau, foin ezekuta fulan lima deit ho orsamentu $26.000 no bainhira Governu reativa aula prezensiál, sei implementa programa merenda eskolár.

Diretór Nasionál Assosiasaun Sosiál no Eskolár, Joaquim Martins, hateten bazeia ba sirkulár ka despaixu husi Governu katak, iha munisípiu neebé iha serka sanitária no KO, suspende atividade eskola-nian inklui  implementasaun programa merenda eskolár.

Eskola iha munisipiu sia neebé agora daudaun seidauk implementa programa merenda eskolár mak hanesan Dili, Ermera, Kovalima, Manufahi, Aileu, Manatutu, Bobonaru, Baucau no Reziaun Administrativa Espesiál Oecusse Ambenu (RAEOA).

Munisipiu haat neebé implementa ona programa merenda eskolár mak hanesan Likisá, Vikeke, Lautem no Ainaru, tanba orsamentu programa merenda eskolár tama iha ida-idak nia konta bankária.

Rate this item
(0 votes)

Independente Digital TV