“Foin dadauk ita rona padre ida iha Oecusse, pedofilia, halo sala ba ita-nia oan sira, agora tama hela iha kadeia Becora. Lú Olo lakohi pedofilia iha Timor-Leste. Bainhira akontese, presiza koopera ho justisa. Tribunal sira atu buka julga ema ne’ebé halo pedofilia hasoru ita-nia oan sira. Buat at ne’e hasai karakter ita-nia oan sira, sei trauma ate boot, to’o katuas no ferik sei trauma hela nafatin tanba hahalok at ida ne’e,”refere nota komunikadu ne’ebé Online INDEPENDENTE, asesu kuarta ne’e.

Kandidatu ne’e hatutan, durante iha tempu portugés no tempu rezisténsia nia laran, nunka rona kazu pedofilia ruma. Foin mak rona kazu pedofilia akontese hafoin Timor-Leste hetan nia ukun rasik-an.

“Nunka rona ida ne’e, rona ne’e hafoin Timor-Leste hetan nia ukun rasik an,”tenik nia.

Tanba ne’e, Lú Olo nia kompromisu polítiku mak defende feto no labarik sira no sei koopera ho orgaun estadu hotu-hotu iha luta atu kombate pedofilia.

Ho nune’e, nia dehan, Estadu tenke garante protesaun ba labarik.

Liu-liu Kandidatu ne’e, enkoraja ba inan no aman atu labele nonok bainhira akontese kazu pedofilia, tanba iha organizasaun barak-barak mak tau matan no proteje labarik sira no mós ba PNTL atu hato’o keixa.

Tuir nia, kazu pedofilia sira ne’e, hanesan hahalok ema katuas sira husi tinan 70 resin ne’ebé mak halo no hamoe ita-nia rain no povu.

“Lú Olo nia kompromisu mak atu defende labarik sira. Se mak halo ida ne’e, nia ba tama kadeia. Liuhusi Tribunal nia tama kadeia. Atu hanorin nian, hanorin sira seluk atu labele tuir nia ain-fatin”.