“Rai ida ne’e presiza FRETIIN no PD no mós CNRT, PLP no KHUNTO. Ita presiza mós sidadaun sira seluk ninian partisipasaun. Ita tenke inklui hotu-hotu, liuliu joven sira iha nivel hothotu sosiedade nian”, dehan nia, iha diskursu tomada de pose estrutura VII Governu Konstitusionál, iha Palasiu Nobre Lahane-Dili, horisehik.

Prezidente Repúblika hakarak ema hotu-hotu nia partisipasaun la fihir feto ka mane. Tanba, dezenvolvimentu ezije jerasaun tuan no jerasaun foun hamutuk hodi tau hamutuk esperiénsia no koñesimentu ho inovasaun no kriatividade.

Tanba, Timor-Leste hahú Independénsia, timoroan la'ós ona povu perseguidu. Timoroan mak autór prinsipál nasaun ida ne’e nian ba istória Timor-Leste ninian.

“Ita moris ho pás no iha estabilidade laran, ita konkista ona respeitu boot husi komunidade internasionál”, tenik nia.

Nia hatutan, iha Nasoins Unidas no instituisaun sira seluk, Timor-Leste nia naran temi dala barak nu’udar ezemplu ida. Nasaun ne’e hatene oinsá rai metin rekursu, tanba iha planu estratéjiku dezenvolvimentu ne'ebé uma forma jerál hothotu bele simu.

Ne’e duni, Xefe Estadu ne’e husu parte hotu tenke hataan, presiza tenke hadi’a di'ak liu tan setór edukasaun, saúde no kualidade serbisu Estadu sira seluk.

Maibé, objetivu sira ne’e atu implementa durante tinan lima nia laran, ‘Lú-Olo’ dehan importante mak presiza kria unidade nasionál, respeitu sidadaun sira nia desizaun, kona-ba sé-sé mak tama iha Parlamentu Nasionál oinsá bele hetan dalan di'ak liután haforsa estabilidade no la’o ba oin ba dezenvolvimentu rai ne’e.