Nia dehan, mensajen ba labarik feto sira tenkeser korajen nafatin, hala'o nafatin moris iha ne'ebé de'it, kuandu akontese karik ba feto sira labele tauk atu hasoru no besik ba autoridade lokáis no seguransa sira, enkoraja mós autoridade lokáis sira atu envolve feto sira iha atividade sira ba dezenvolvimentu nasaun ne'e nian.

"Loron Feto nian monu iha loron 3 Novembru, maibé hanesan tuir ita-nia lisan dia 1 feriadu, dia 2 loron Matebian, tama kedas ba 3 Novembru ami-nia tempu mak la permite ka la ajuda para ami atu komemora, maibé ha'u-nia mensajen ba feto sira korajen nafatin hala'o moris no labele tauk," dehan Aliança, iha Parlamentu Nasionál, Sesta (30/10).

Prezidente GMPTL husu ba feto sira atu selebra loron nasionál ne'e ho família no amiga sira iha ida-idak nia fatin, maski laiha serimónia ofisiál ruma maibé enkoraja nafatin feto selebra iha ida-idak nia fatin.

Iha loron ne'e mós husu atu feto sira relembra mós ba feto maluk sira ne'ebé luta fó vida tomak baTimor-Leste ukun aan oras ne'e laiha, husu nafatin sira nia tulun.

"Loron Nasionál feto mós ita tenke hanoin ita nia feto maluk sira ne'ebé luta na'in sira ne'ebé mate ona iha Timor laran tomak, liu-liu iha rezisténsia nian, ita husu nafatin ba sira atu ajuda nafatin ita fó Forsa, korajen no kbiit para ita hala'o serbisu durante ita sei moris," nia afirma.

Nia hatutan, loron Nasionál feto hanesan inan feton, alin feto ho nia Parseiru sira tenke haree sira di'ak, hadomi malu halo metin nafatin uma kain idak-idak respeitu mós mane sira no mane sira mós respeitu Feto sira para bu'at hotu bele la'o di'ak.

"Hanesan violensia domestika mosu beibeik ba feto ne'e, iha haree katak buat ne'e maioria ne'e mane sira mak sempre halo ba feto mais tanba dala ruma mós ami feto sira mós provoka mane sira, ne'ebé di'ak liu iha uma laran ka iha li'ur tenke kompriende malu, rona malu para bu'at hotu-hotu bele sai ba di'ak," nia salienta.

Nia hatutan, tenke enkoraja malu husu mós bá autoridade lokáis sira atu konvense inan feton sira, enkoraja sira atu bele ko'alia sai bu'at ne'ebé akontese ba sira ida ne'e mak importante.

Ida seluk maka, sé karik akontese violasaun ka asediu seksual ruma ba feto hanesan ne'e tenke buka autoridade sira informa ba para autoridade sira bele atua.