Lere Husu Ba Governu Legaliza Arte Marsiál Featured

By Cristina Ximenes Dezembru 13, 2019 3466
Komandante Lere Komandante Lere

DILI: Grupu arte marsiál durante sai idéntiku ho problema. Maibé, difisil atu kontrola hafoin Parlamentu Nasionál deside hodi taka grupu sira ne’e.

Tanba konsidera grupu arte marsiál sira ne’e laiha lejitimidade maka difisil atu hatene sé atu responsabiliza bainhira iha membru grupu sira ne’e halo krime.

Ne’e duni, Xefe Estadu Maiór Jenerál FALINTIL Forsa Defeza Timor Leste (F-FDTL), Majór Jenerál Lere Anan Timur, husu governu atu loke arte marsiál ho ninia estrutura, estatutu no sede, atu bele kontrola.

Nia dehan, seidauk akontese situasaun grave iha TL, maibé sempre mosu konflitu ki'ikoan iha fatin-fatin ne’ebé envolve husi membru grupu arte marsiál. Maski nune’e, la rona arte marsiál maibé grupu maka ataka malu.

Tan ne’e, Lere hateten sujere ba governu atu autoriza ezisténsia arte marsiál iha Timor.

“Governu loke arte marsiál ho ninia estrutura própriu ho ninia estatutu ho ninia sede buat sira ne’e hotu atu ita bele kontrola”, dehan nia, iha Palásiu Prezidensiál Bairru-Pité, horisehik.

Nia esplika, bainhira ezisténsia arte marsiál nian klaru ona maka sei bele kontrola no minimiza konflitu iha rai laran.

Solusaun maka tenke loke atu haree sira nia estatutu hanesan organizasaun desportu sira seluk atu bele kontrola, se lae maka situasaun sei nafatin.

Hafoin hato’o kestaun ne’e ba Xefe Estadu, nia konkorda tanba buat ne’e tenke organizadu hanesan PSHT, IKS, KORK, no 77 maka halo konflitu maibé laiha evidénsia tanba organizasaun ne’e la eziste.

Bainhira organizasaun ne’e eziste kuandu iha problema ruma bele bolu nia responsavel hodi responsabiliza ninia membru sira ne’ebé envolve iha aktu ne’e.

Rate this item
(0 votes)

Independente Digital TV