Laiha Kontrolu Ba Fatin Izolamentu Tasi-Tolu Featured

By Ekipa Independente Juñu 04, 2021 387
Sala Izolamentu Tasi-Tolu. Foto:Independente. Sala Izolamentu Tasi-Tolu. Foto:Independente.

DILI:Pasiente Covid-19 ne’ebé baixa iha Sala Izolamentu Tasi-Tolu, laiha ema ida mak halo kontrolu ba sira.

Tuir informasaun husi pasiente Covid-19 na’in ida relata, hahú husi loron dahuluk (01/06) ne’ebé nia tama iha Izolamentu to’o ohin loron (04/06), laiha ema ida ka mediku atu halo kontrolu ba pasiente sira.

Nia dehan, iha loron dahuluk simu deit aimoruk vitamina musan rua husi mediku sira, maibé to’o agora tama ona ba loron hat, seidauk iha mediku ida mak mai atu haree sira nia kondisaun.

Tanba ne’e halo pasiente sira prekupa tebes ho sira nia kondisaun, ne’ebé laiha ema ida tau matan.

Aleinde, pasiente sira mós prekupa kona-ba situasaun iha izolamentu laran, iha kuartu laiha ahi ne’ebé lakan tanba lampu (ampolas) keima, haris fatin ladiak no laiha bee, kuartu seluk ahi sempre lakan mate iha tempu kalan.

“Iha kuartu ida ne’ebé ha’u ho kolega na’in tolu hela ne’e, ami nia lampu keima no la-lakan, kalan ami loke deit odamatan haris fatin atu nune’e lampu bele naroman tama mai, se lae nakukun los, ”dehan pasiente.

Ho nune’e, pasiente sira konfirma mediku ida no hateten katak ahi ne’e aat durante fulan rua ona.

Maski, mediku sira informa ona ba parte relevante sira maibé to’o ohin loron seidauk iha resposta.

Entretantu, pasiente Covid-19 ne’ebé hela iha parte lona nian, kuaze pasiente feto no mane sira toba hamutuk deit, tanba laiha ema ne’ebé atu atende sira.

Tuir observasaun, ambulansia lori sira mai hatun hela deit no laiha ema atu lori sira ba husik iha fatin.

To’o notisias ne’e públika Online-INDEPENDENTE seidauk halo konfirmasaun ba parte Ministeriu Saúde no SIJK kona-ba situasaun ne'ebé pasiente Covid-19 enfrenta.

 

Asistente Editor: Saturnina da Costa

Rate this item
(0 votes)

Independente Digital TV