Tuir planu Governu nian, orsamentu ne’e tau prioridade liu ba prioridade urjente no rezolve nesesidade báziku povu nian, liuliu saúde no área importante sira seluk.

Portavós Governu no Sekretáriu Estadu Konsellu Ministru no Komunikasaun Sosiál, Matias Boavida Freitas hatete, orsamentu ne’e rasik aprovadu ona iha Konsellu Ministru hodi submete ba Parlamentu Nasionál.

“Governu hanoin entre prioridade ne’ebé iha. Tanba ne’e, Orsamentu Retifikativu ba situasaun emerjénsia ne’ebé ita iha”, dehan nia, hafoin remata reuniaun Konsellu Ministru, iha palásiu Governu, horisehik.

Nia esplika, Governu nia prioridade rezolve uluk nesesidade povu nia moris, tanba ne’e deside Orsamentu Retifikativu ne’e hataan uluk ba povu nia ezijénsia.

Ho lian makaas portavós Governu ne’e mós lamenta bainhira polítiku sira liuliu Deputadu kontinua dada polítika hodi halo povu terus ba beibeik. Ne’e duni, tenke tau prioridade liu ba nesesidade hadi'a povu nia moris di'ak.

Tanba ne’e, Primeiru Ministru sei substitui nia membru iha VII Governu Konstitusionál lori dokumentu Orsamentu Retifikativu ba Parlamentu Nasionál atu aprova.

Laiha Osan Ba Eleisaun Antesipada

Ezisténsia VII Governu Konstitusionál seidauk iha ninia klaridade. Interese grupu polítiku sira sei dada malu kona-ba formasaun governu rasik. Ida dala tolu ne’ebé bele akontese iha momentu ne’e.

Dala ida maka kontinua ho VII Governu ne’ebé forma husi bloku minoria partidu FRETILIN no Partidu Demokrátiku (PD). Dala seluk mak Prezidente Repúblika bele entrega fali ba bloku Aliansa Maioria Parlamentár (MAP) kompostu husi partidu CNRT, PLP no KHUNTO. No alternativa ikus liu maka eleisaun antesipada.

Maski nune’e, VII Governu rasik la prevé osan rum aba eventu eleisaun antesipada. Governu hili dala ida ne’e tanba fiar metin nafatin VII Governu Konstitusionál sei kontinua eziste to’o tinan lima.

Sekretáriu Estadu Konsellu Ministru, Matias Boavida Freitas hatete, oras ne’e daudaun Governu seidauk ko’alia kona-ba alokasaun item Orsamentu Retifikativu hodi rezerva ba eleisaun antesipada.

“Ami la fiar katak eleisaun antesipada mosu iha tempu badak no ami la presiza”, dehan nia.

Nia hatutan, Governu maski minoria iha Parlamentu Nasionál, maibé sei dura ukun povu ho nasaun ne’e to’o tinan lima nia laran.

Tanba ne’e, Governu kompromete VII Governu Konstitusionál prontu ukun nasaun ne’e to’o tinan lima hodi lori povu ho nasaun ne’e ba moris di'ak, tanba ne’e mak eleisaun antesipada sei la akontese iha tempu badak.