Konstrusaun Eskola Tarde, Diretór Eskola 5 Maiu ‘Fó Sala’ ba Kompañia ho Governu Featured

By Cesarina de Carvalho Fevereiru 11, 2024 738
Prosesu konstrusaun ba Eskola 5 Maiu, Bekora. Foto: Google. Prosesu konstrusaun ba Eskola 5 Maiu, Bekora. Foto: Google.

DILI: Diretór Eskola Ensinu Sekundáriu Jerál 5 de Maiu, Adelino Nicolau Hornai, ‘fó sala’ ba kompaña Maluk, Ministériu Edukasaun no Ajénsia Dezenvolvimentu Nasionál, tanba laiha liña kordenasaun ne’ebé mak diak hodi impaktu ba konstrusaun eskola tarde.

Diretór Eskola Ensinu Sekundariu Jeral 5 de Maiu, Adelino Nicolau Hornai hatete, konstrusaun Eskola ne'e hahú iha  loron 20 fulan-abríl tinan 2022 to’o fulan-outubru tinan 2022 ho durasaun fulan-6, maibe nia prosesu ne'e tarde, tanba falta kordenasaun entre kompaña ho ME no ADN.

“Konstrusaun Eskola 5 de maio tinan ida-resin ona, maibe  seidauk di'ak, tanba kompaña ne'ebe mak ME no ADN fo tender ne'e falta kordenasaun di'ak, entaun halo konstrusaun sira-ne'e lao tarde loos,” Diretór Eskola Ensinu Sekundariu Jeral 5 de Maiu, Adelino, iha nia kna'ar fatin, Kinta (8/02).

Nia informa, koordenasaun entre sira-ne'e menus, tanba ne’e material ba konstrusaun mos tama tarde no konstrusaun ne'e foin mak atinje porsentu  pursentu 45.

“Konstrusaun ne'e foin mak atinji 45% no foin chor iha leten sira-ne’e, no ita hotu haree la’o tarde loos, tanba ita kontratu ne’e ba fulan 6, maibe agora tinan ida-resin ona seidauk remata. Ba ida nee ha'u mos fo hatene ona ba ME no ADN atu kontrola, nune’e bele finaliza lalais,” Nia hatete.

Relasiona ho konstrusaun ne'ebé tarde, nia informa, kada tinan estudante sira hala'o ezame nasional tenke ba fali iha Eskola Sekundaria Jeral (ESG) 12 de Novembru no Eskola Sergio Vieira  de Mello, tanba estudante barak.

Nia informa, kompañia ne'ebe mak halo konstrusaun ne'e mai husi kompañia Maluk Unipessoal Lda ho totál orsamentu ba konstrusaun $355,629.46.

“Kompaña ba konstrusaun ESG 5 de Maiu mai husi kompaña Maluk unipessoál, LDA, ne’e ba konstrui sala 8 ho andar, ho orsamentu hamutuk $355,629.46, no trabalhador ne'ebe mak hala’o konstrusaun ne'e hamutuk na’in-16, “ Nia informa.

Nia informa, iha eskola ne'e sala-de-aula menus, maibé halo turnu, dadeer no lorkraik,  tanba ne’e husu ba kompaña atu aselera konstrusaun ida-ne'e.

Purtantu Eskola Ensinu Sekundáriu Jerál Públiku 5 de Maio Becora ne'e iha profesór permanente hamutuk 59 ne'ebé kompostu hosi feto 22 no mane 37, ho totál estudante hamutuk 1.456 no sala-de-aula hamutuk 14.

Ba kestaun ne'e, jornalista sira konfirma jerente Kompañia Maluk Unipesoal, Lda, maibé  lakohi  fó informasaun.

Entretantu konstrusaun ne'e hahú iha abríl 2022 no loloos finaliza iha outubru 2022 maibé tanba kestaun seluk la konsege finaliza, entaun kontinua estende ba fulan-6.

Rate this item
(0 votes)

Independente Digital TV