Konfirmadu Pozitivu Covid-19 Na’in 12 Hein Rezultadu Teste Daruak Featured

By Elsa Belinha Maiu 01, 2020 3288
Dra. Odete Viegas Dra. Odete Viegas

DILI: Pasiente konfirmadu pozitivu Corona Virus Deasses 2019 (Covid-19) na’in 12 ne’ebé agora dadaun iha fatin izolamentu Vera Cruz sei halo teste ba daruak.

Portavoz Sentru Integradu Jestaun Krize (SIJK) Doutora Odete Viegas Da Silva hatete, kazu konfirmadu pozitivu Covid-19 mantein 24, kompostu husi na’in rua (2) rekuperadu antes, na’in 10 rekuperadu iha kinta-horsehik no na’in 12 sei iha fatin izolamentu.

“Agora dadaun iha fatin izolamentu Vera Cruz falta na’in 12 maka sei baixa iha ne’eba. Sira sei halo tan teste laboratóriu dala rua tutuir malu maka nia rezultadu negativu bele sai ona,” dehan nia iha konferensia imprensa iha CCD, ohin.

Sira na’in 12 ne’ebé sei iha fatin izolamentu, na’in lima maka halo teste negativu dala ida ona no na’in hitu maka nia rezultadu sei pozitivu nafatin.

Nia informa, liu tiha loron ida ka rua maka halo tan teste ba sira hodi bele hatene sira nia progresu ne’e.

Dadus iha loron 1 fulan-Maiu ne’e total kumulativu ema ne’ebé halo teste laboratóriu hamutuk 671. Total ema ne’ebé hein rezultadu 169. Total rezultadu laboratóriu negative hamutuk 478.

Total ema ne’ebé iha konfinamentu obrigatoriu 342 kompostu husi Dili hamutuk 263 no iha Munisipiu 79.

No ema ne’ebé halo auto konfirnamentu hamutuk 61 kompostu husi Dili walu (8) no munisipiu 53.

Total ema ne’ebé passa ona loron 14 iha konfinamentu hamutuk 1423 no iha munisipiu 359.

Husu ba komunidade atu kumpri nafatin protokolu husi Organizsaun Mundial Saúde (OMS) nian kuidadu nafatin ijiene pessoal fase liman bebeik mantein distansiamentu sosial nomós distansiamentu fíziku.

Hakmatek iha uma kuandu la iha nesesidade ne’ebé importante iha li’ur. Sai ba li’ur tenke uza maskara.

Nia mós informa, bainhira iha sintomas infesaun respiratória aguda (IRA)  hanesan isin manas, kakorok moras, me’ar, inus-been, ruin kiik- bo’ot siin halo favor ba konsulta iha sentru saúde ka ospital sira.

Se lakohi atu hetan moras Covid-19 ne’ebé grave ka krítiku halo favor hapara fuma sigaru no hemu tua.

Rate this item
(0 votes)

Independente Digital TV