Serteza, ida ne’e konfirma husi Primeiru Ministru, Kay Rala Xanana Gusmão, hafoin reuniaun Konsellu Superior Defeza no Seguransa (KSDS).

“Papa Francisco sei mai iha fulan Agostus. Hanoin katak ita iha tempu naruk atu halo buat hotu ne'ebé komisaun dehan tenke halo ida ne'e no halo ida ne'ebá, liu-liu tanba Papa Francisco idade ona,” informa PM Xanana hafoin reuniaun dahuluk KSDS iha palasiu Prezidensia Bairo-Pite, Kinta (08/02).

Iha Amu Papa nia vizita ne’e, PM Xanana dehan, la’os de’it vizita Timor-Leste maibé vizita mós nasaun seluk hanesan Papua New-Guine, Singapura no Indonezia.

“Papa Francisco mai ne'e iha fatin haat kedas, dala uluk iha Papua New-Guine, Timor-Leste, Singapura, no Jakarta,” dehan nia.

Ho ida ne’e, Xanana hatutan, PR Horta husu ba governu no husu ba membru KSDS atu koordena malu hodi prepara daudaun kondisaun sira, liu-liu seguransa nian.

Tuir informasaun, Xefe Governu ne’e hatete, iha fulan Maiu komisaun husi Vatikanu sei mai tan Timor-Leste hodi haree saida mak TL halo ona relasiona ho Amu Papa nia vizita.

Molok ne’e, Prezidente Repúblika, José Ramos Horta informa, iha ninia vizita ba Vatikanu, Amu Papa ko'alia kona-ba nia vizita mai Timor Leste.

"Ha'u labele ko'alia sai bainhira loos mak Amu Papa mai Timor-Leste, Santa-Se mak sei fó hatene sai, sintunia ho Igreja no Governu. Ha'u hatete de'it agora buat sira ne'e hotu-hotu konfirmadu Amu Papa sei mai duni, ita reza de'it Amu Papa nia saúde kontinua di'ak," dehan Horta.