Reprezentante uma-kain neen iha eskola 04 Setembru, Abrão Mendonça, hatete, sira nia parte seidauk hetan karta notifikasaun husi Governu liu husi Ministeriu Edukasaun no mós Sekretária Estadu Asuntu Toponimia no Organizasaun Urbana.

“Ami seidauk simu karta notifikasaun husi parte Ministeriu Edukasaun ho SEATOU, tamba rai ne estadu nia duni, estadu iha direito para atu atu foti rai sira ne’e, maibé hanesan sidadun no povu baibain, Governu tenki ajuda netik buat ruma mai ami atu ami bele sai fali hali fatin seluk, ami so husu ida ne’e de’it, ami hakarak, ami kopera no prontu sai,”dehan nia ba Online INDEPENDENTE segunda foin lalais ne’e.

Iha sorin seluk, Diretór Eskola Sekundaria Jerál 04 de Setembro, Sergio A. da Cruz hateten, komunidade sira ne’ebé hela iha areadór eskola nian, iha xefe familia uma-kain ne’en (6) ne’ebé maka hela hamutuk iha uma tolu.

Komunidade uma-kain hirak ne’e okupa hela uma ne’ebé iha okupasaun Indonezia halo ba professor sira hodi hela.

“Bainhira ami dada lia ho komunidade sira, komunidade sira hatan katak sira prontu kopera, maibé sira hein de’it karta notifikasaun husi parte Ministériu Edukasaun ka mai husi parte ne’ebé de’it, sira prontu atu kopera,”haktuir Diretór Eskola ne’e.

Nia hatutan, problema ida, ho komunidade sira ne’ebé hela iha areadór eskola ne’e maka bele  dehan fó impaktu la diak, bainhira eskola kuandu sai ona tuir lolos  portaun  ne’e  taka, atu nune’e ambiente eskola ne’e hakmatek no asegura patrimonia estadu nian, sasan eskola nian.

Maibé, tanba komunidade sira sei hela iha ne’e, entaun kuandu eskola sai portaun labele taka, portaun nakloke hela de’it, labarik sira ba pinta simbolu artemarsiais iha paredi eskola nian no iha portaun eskola nian.

“Ida ne’e mak ladiak no bainhira prosesu aprendizajen la’o hela, labarik ki’ik sira lori sasan ba fa’an iha turma laran,”tenik nia.

ALeinde ida ne’e, komunidade sira mós fa’an sasan iha areadór eskola hodi soe  lixu ne’ebé  barak ou bele halo ambiente eskola ne’e foer.

Tanba ne’e mak husu ba parte Ministériu Edukasaun atu bele rezolve  komunidade sira ne’e, atu nune’e  bainhira eskola sai, portaun  eskola tenki taka.

Entretantu, Diretór eskola ne’e mós husu parte autoridade munisípiu ho Ministériu Edukasaun atu bele kopera malu, nune’e iha  ano letivu foun tinan 2026,  eskola ne’e bele hakmatek ona.