Sekretária Estadu Asuntu Toponimia no Organizasaun Urbana Germano Santa Brites hatete, antes atu hasai komunidade sira husi fatin refere, ekipa konjunta mós fó ona informasaun ba Autoridade Lokál atu aviza ba komunidade sira atu bele prepara, molok ekipa hasai sira. Nune’e, komunidade sira mós koopera ho Governu ba kona ba dezenvolvimentu.

Tanba ne’e, SEATOU dehan, ekipa hasai komunidade sira ne’ebé maka okupa propriedade estadu, tanba tuir planu fatin ne’e estadu sei uza atu harii fali buat ruma.

"Fatin ne'e sei konstrui ba planu estadu no governu nian, tanba ne'e ohin halo eviksaun hodi komunidade sira ba fali ida idak nia fatin,”dehan nia ba Jornalista sira iha Aldeia Laloran Suku Bairo-Pite, Segunda ne’e (21/07).

Governante ne’e hatutan, Komunidade uma-kain 61 ne'ebé maka hetan despezu administrativu iha Aldeia Laloran, maioria husi Munisipiu Likisa, Bobonaro, no Vikeke.

 Nune’e, komunidade sira ne’ebé sei fila ba munisipiu, SEATOU sei koordena ho Autoridade Munisipiu Dili atu bele apoiu kareta ruma hodi transporta sira fila ba munisipiu.

Aliened ne’e, koordena mós ho Ministeriu Edukasaun atu falisita estudante sira ne’ebé maka sei fila ba munisipiu.

Nune’e, mós ba Ministeriu Obras Públika  atu bele resolve kompensesaun ba komunidade afeitadu sira.

Tanba, kona ba indiminizasaun, Governu sei fó tuir modelu uma ne’ebé ekipa rekolla, maibé prosesu hotu sei liu husi Ministeriu obras Públika

Iha fatin hanesan, Vitima afeitadu, Maria do Nasimento  deklara katak, sira hela iha fatin refere hahú iha Aldeia Laloran nian, hahú iha tinan 1.953, no sira pronto koopera ho Governu atu sai husi fatin refere, maibé  Estadu mós tenke haree no identifika didiak rai estadu no rai privadu.

Entretantu, Komunidade afeitadu Hermenegildo Brites hatete, nia parte koopera ho estadu hodi kontribui ba dezenvolvimentu nasaun, tanba espasu ne’ebé sira okupa nuudar proopriedade estadu nian.