Sekretária hatete, programa UNP+ fahe ba kategori rua, kategoria A mak governu fó material kompletu hahú husi fondasi to'o uma kakuluk no kategoria B mak governu fahe de'it kalen ba benifisiariu sira ne'ebé nia uma kalen fruzeb no kuak ona.

"Kalen ne'ebé governu fahe kualidade la hanesan ho kalen babain ne'ebé fa'an iha loja sira, tanba kalen bainhira halo bele dura to'o tinan rua nolu mós seidauk aat," dehan nia Barique, kinta (27/04).

Tanba ne'e, Sekretaria Ezekutiva husu ba benifisiariu sira atu bainhira simu ona kalen tenki troka kedas no labele ba rai deit no faan fila-fali.

“Se benifisiariu sira mak hakarak fa'an fali kalen ne'e, sei taka dalan fila-fali ba komunidade sira ne'ebé seidauk hetan, tanba bainhira benifisiariu sira ne'ebé hetan ona kalen ekipa PNDS sei halo survei,”tenik nia.

Iha fati hanesan, Xefi Suku Sikone-Diloli Mateus da C. Amaral hato'o agradese ba Oitavu Governu ne'ebé lidera husi Primeiru Ministru Taur Matan Ruak ba progama durante ne'e, ne'ebé ema hotu sente ona.

"Ohin ita halibur hamutuk iha ne'e, ha'u lori komunidade suku neen husi Postu Administrativu Barique nia naran hato'o agradese ba Oitavu Governu, ne'ebé ohin halo tan lansamentu ba programa UNP+B hodi distribui zinku ba benifisiariu sira, tanba ne'e, ami apresia," katak nia.

Xefi suku Barique hatete, maske oitavu Governu nia mandatu remata ona, tanba ne'e husu ba Governu tuir mai nafatin kontinua programa sira ne'ebé oitavu governu planeia ona.

Entertantu, Reprezentante Benifisiariu Leandro Aleixo, hato'o agradese wa'in ba Oitavu Governu ne'ebé kaer ukun durante ne'e. Maske iha tempu balun senti difisil tebes ba sira maibé tempu ida ohin bele halo sira senti kontenti ona.