Iha 16 Outubru, kompaña lokal hamutuk ho komunidade balun hakat ba fatin implementasaun projetu hodi hapara atividade ne’ebé trabaladór sira husi kompaña Rubic, Unipesoal Lda.

Diretór Kompaña Samarinta, Samuel Napoleão Guterres hatete, molok implementasaun projetu, kompaña lokal mak halo levantamentu dadus ba estrada refere bazeia ba proposta husi autoridade lokal ba Ministériu Obras Públika (MOP).

Maibé, bainhira ba implementasaun projetu ne’e, MOP entrega fali projetu ba kompaña Rubic, Unipesoal, Lda. la liu husi konkursu.

"Ami hanesan inisiador ba prosesu estrada rural husi ponte Maufelo mai to'o ponte Bekusse,” dehan nia ba Jornalista Jornal INDEPENDENTE, iha Taibessi, Kinta (16/10).

Diretór ne’e dehan, nia parte hato’o ona lamentasaun ba MOP relasiona ho prosesu tomak ne’ebé sira konsidera hanesan traisaun ida ba inisiador prosesu projetu reabilitasaun estrada.

“Ami husu ba MOP atu hato'o despaixu ba ami-nia investor Star King, maibé desizaun final  ministru nomeia direita fali Señora Clarisia hanesan na'in ba kompañia Rubic, ho razaun ida katak Star King iha obras barak liu,” dehan nia.

Diretór ne’e kestiona desizaun husi MOP tanba projetu ne’e nu’udar pakote urbana laos projetu emerjensia.

"Tanba ami halo halo levantamentu tinan rua resin, ami halo levantamentu dadus no gastu despeza barak ba iha prosesu ida ne'e, maibe ikus fó direita fali ba parte seluk, ida ne'e ami konsidera iha broker berdasi ba atribuisaun projetu ida ne'e," katak nia.

Bainhira laiha solusaun, kompaña Samarinta sei hato'o keixa ba Komisaun Anti Korrupsaun (KAK) hodi prosesa kazu refere.

"Tanba ami konfirma ho na'in ba kompañia Rubic, senóra Clarisia Lay katak 50 porsentu husi projeitu ne'e ba iha ekipa kompaña no 50 porsentu ba iha sira MOP, ida ne'e tama iha korupsaun ka lae?," nia alega.

Relasiona kestaun ne’e, Jornalista Jornal INDEPENDENTE koko halo konfirmasaun ho parte kompaña Rubic no MOP, maibé seidauk hetan resposta pozitivu.

Entretantu Joranalista Jornal INDEPENDENTE, koko atu halo komfirmasaun ho na'in ba kompañia Rubic Unip.Lda, maibe la iha fatin.