Kazu ne'e akontese iha 29 Outubru 2025 maizu menus tuku 15:00 Otl, deskonfia membru polísia ne'e lori pistola tiru aan iha hariis fatin laran.
Nia informa, hafoin kazu ne'e akontese nia simu kedas relatoriu husi komandante UPF, Euclides Belo, nune'e orienta kedas ba iha parte DIKN hodi investiga.
"Ha'u hetan relatoriu horiseik lokraik husi komando UPF katak, iha membru ida iha postu UPF nian iha Bobonaro ne'ebe maka tiru aan. Depois ita simu informasaun ida ne'e, ita orienta kedas parte investigasaun kriminal nasionál forensik para sira ba kedas fatin ne'ebá, para halo servisu investigasaun ninian", Komisariu ne'e, informa ba jornálista sira iha kuartel UEP, Bairo-Pite, kinta (30/10).
Kauza tanba saida tiru aan, nia dehan, parte DIKN sei hala'o hela servisu investigasaun, tanba ne'e seidauk hateten lolos ninia kauza ka motivu ruma ne'ebe mak hodi nia tiru aan.
"Dalá-ruma ligadu mós presaun servidu todan, tanba dalá-ruma ita-nia kolokasaun membru sira iha ne'ebá iha ema na’in ka ema nain tolu, ida ne'e mós sai hanesan impaktu, tanba ema kuandu servisu iha presaun maka'as nia bele foti desizaun hanesan ne'e", nia afirma.
Nune'e, dalá-ruma mós tanba psikologia, tanba ema ida de'it nia halao serbisu oras 24 nia laran no distansia ne'ebe mak, nune'e mós sai mós hanesan pontensia ida hotu ba membru ne'e.
Komisariu ne'e dehan, antes ne'e membru refere nia kondisaun nomos hala'o servisu normál, maibé klaru liu hein rezultadu investigasaun husi DIKN nian, ne'ebe dadauk hala'o hela servisu.
Iha fatin hanesan, Xefe Estadu Maior Jeneral FALINTIL-Forsa Defeza Timor-Leste (F-FDTL) Tenente Jeneral Domingos Raul Falur Rate Laek, hateten, hato'o sentidu soliedariedade no kondelensia ba membru UPF ne'ebe hakotu vida liu-husi Tiru aan.
"Ita apoiu kamaradajem esperitu soliedariedade, ita komenta triste hare ita-nia alin sira oho oan, tanba dalá-ruma sira senti katak, sira mesak izoladu laiha maluk ida apoiu Sira. Ita bele dehan katak, sira ne'e depresaun mental, dala-ruma problema sira halo sira la fo solusaun, tanba ne'e ita fo ita-nia apoiu soliedariedade, esperitu kamaradajem", nia espresa.
