KM Halo Alterasaun ba Rejime Espesiál Aprovizionamentu Vizita Papa Francisco iha TL Featured

By Mariano Mendonça Abril 25, 2024 202
Reuniaun Konsellu Ministru, diriji husi Primeiru Ministru Kay Rala Xanana Gusmao, iha Palasiu Governu, (24/04/24). Foto:Media Portal Governu. Reuniaun Konsellu Ministru, diriji husi Primeiru Ministru Kay Rala Xanana Gusmao, iha Palasiu Governu, (24/04/24). Foto:Media Portal Governu.

DILI: Konsellu Ministru (KM) deside halo Alterasaun bá rejime Espesiál Aprovizionamentu Vizita Amu Papa Francisco nian, nune'e hodi ajusta prosedimentu legal sira.

Aprovasaun projetu Dekretu-Lei alterasaun dahuluk ba Rejime Espesiál Aprovizionamentu kona-ba Vizita Sua Santidade Papa no ezekusaun Orsamentu Jerál Estadu tinan 2024 nian, ne’e aprezenta husi Ministru Administrasaun Estatál (MAE), Tomás do Rosário Cabral.

Ministru Asuntu Parlamentár Aderito Hugo da Costa hatete, Projetu Dekretu-Lei ida ne’e ho objetivu atu ajusta prosedimentu legál sira ne’ebé vijente atu garante preparasaun ida ne’ebé efisiente no lais kona-ba vizita papál nian mai Timor-Leste, ne’ebé konfirma ona ba loron 9 to’o loron 11 fulan Setembru tinan 2024.

"Konsellu Ministru halo aprova mós projetu Dekretu Lei Alterasaun dahuluk bá rejime Espesiál Aprovizionamentu kona-ba vizita Sua Santidade Amu Papa no ezekusaun Orsamentu Jerál Estadu tinan 2024 ne'ebé Aprezenta husi Munistru Administraun Estatal," dehan nia hafoin reuniaun Konsellu Ministru iha Palásiu Governu, Kuarta (24/04).

Nia fundamenta, kuadru legál atuál aprezenta formalidade ne’ebé la tuir ho urjénsia preparativu, no presiza fleksibilidade administrativa ida hodi hasoru situasaun estraordinária ida-ne’e.

Tan ne’e, propoin atu simplifika prosesu sira aprovizionamentu nian, ho adosaun medida sira ne’ebé garante ajilidade iha prosesu no esklarese regra sira ezekusaun despeza nian hodi permite sirkulasaun ida ne’ebé adekuada ba rekursus entre entidade sira ne’ebé envolve iha organizasaun vizita papál nian. Tanba ne’e, projetu ida ne’e ho objetivu atu asegura katak Timor-Leste bele organiza eventu ida ne’ebé ho magnitude boot no importánsia internasionál ho efikásia, efisiénsia no seleridade ne’ebé presiza.

Nia fundamenta, Ida ohin kona-ba Alterasaun bá Dekretu Lei bá Orsamentu vizita Amu papa ninian ne'e mak halo Alterasaun ida tanba Dekretu ne'e hasai antes no implentasaun komisaun Organizadora haree katak presiza halo ajustamentu bá Dekretu ne'e.

Ho ida ne'e mak halo aprezentasaun para depois halo fali Alterasaun ajusta fali tanba depois de implentasaun deteta katak serbisu ida ne'e konsentra loloos ba vizita Papa ninian entaun na prátika haree katak iha difikuldade balu entaun halo ajustamentu de'it.

"Kona-ba ezekusaun ita hotu-hotu bele asesu de'it iha portal transparansia iha ezekusaun Primeiru trimestral nian dadus ne'e aberta bá Públiku sé de'it mak hatene Informasaun ne'e bele haree iha Portal governu nian bele hatene ezekusaun Primeiru trimestral atinje to'o hira ona," tenik nia.

Rate this item
(0 votes)

Independente Digital TV