Programa ne'e kompoin husi área prinsipál neen mak hanesan, afirma fila-fali Estadu Direitu Demokrátiku, dezenvolvimentu kapitál sosial, dezenvolvimentu infraestruturas, dezenvolvimentu ekonomia, konsolidasaun governativa no boa governasaun no mós kombate hasoru korrupsaun. 

“Durante semana ida halo diskusaun ba esbosu ne'ebé Primeiru Ministru aprezenta ba membru Governu hotu-hotu halo redasaun, hadia, hatutan no ohin hetan duni aprovasaun husi Konsellu Ministrus,”dehan Ministru Prezidensia Konsellu Ministru Hermenegildo Azio Perreira,  liu husi konferensia imprensa, iha Palasiu Governu, (12/07).

Nia dehan, programa ne'e sintetiza politikas públikas prinsipais ne'ebé atu adota durante IX Governu ninia mandatu. 

Ne'ebé ho objetivu mak atu hametin no otimiza setores governasaun nian no sira nia rekursu, hodi habadak dalan atu transforma vizaun Ajenda Dezenvolvimentu Sustentavel 2030 nian no Planu Estratejiku Dezenvolvimentu 2011-2030 nian hodi sai realidade.

"Ohin Konsellu Ministru halibur ba konsidera de'it asuntu importante tebes ida bolu programa IX Governu konstituisional ninia hodi aprezenta ba Parlamentu Nasionál hodi hetan aprovasaun," tenik Ministru. 

Governante ne'e afirma, Konsellu Ministrus delibera ona mós aprezenta ba Parlamentu Nasional votu konfiansa ida ba Governu, ne'ebé fundamenta husi kompromisu ne'ebé firme no determinadu Governu atu implementa ninia programa, ho objetivu atu promove dezenvolvimentu, prosperidade no moris diak ba sidadaun timoroan.