KM Aprova Ona OJE 2024 ho Montante Billaun $ 1.95 Featured

By Mariano Mendonca Novembru 22, 2023 1018
Reuniaun Konsellu Ministru, diriji husi Primeiru Ministru Kay Rala Xanana Gusmao, iha Palasiu Governu. Foto:Dok. Reuniaun Konsellu Ministru, diriji husi Primeiru Ministru Kay Rala Xanana Gusmao, iha Palasiu Governu. Foto:Dok.

DILI: Governu dasia ne’ebé lidera husi Primeiru Ministru (PM), Kay Rala Xanana Gusmão, liu husi sorumutuk  Konsellu Ministrus (KM) aprova ona projetu Proposta Lei Orsamentu Jeral Estadu (OJE 2024 ) ho montante billaun $ 1.95.

Projetu proposta Lei Orsamentu Jeral Estadu ba tinan 2024 ne’e aprezenta husi Ministra Finansas, Santina José Rodrigues Ferreira Viegas Cardoso ho valor konsolidadu.

"Konsellu Ministru aprova ona projetu Proposta Lei Orsamentu Jeral Estadu ba tinan 2024, ho valór totál konsolidadu billaun rihun U$ 1,95 ba Administrasaun Sentrál, RAEOA no Seguransa Sosiál, sein Fundu Rezerva Seguransa Sosiál," haktuir iha komunikadu ne'ebé Jornalista Independente asesu husi Mídia Gabinete Prezidensiá Konsellu Ministru, (21/11).

Husi tetu konsolidadu valór ida ne’e inklui mós dotasaun millaun rihun US$ 1,83 ba administrasaun sentrál no millaun US$ 60 uza ba Rejiaun Administrativa Espesial Oekusse Ambenu (RAEOA).

Husi montante totál despeza ne’ebé prevee ba Administrasaun Sentrál no RAEOA, millaun U$ 468,8 uza ba saláriu no vensimentu, millaun U$ 386,3 ba bens no servisu, millaun U$ 589,7 ba transferénsias públikas, millaun U$ 34,2 ba kapitál menór no millaun U$ 411 ba kapitál dezenvolvimentu.

Enkuantu, Orsamentu bá seguransa sosiál, inklui fundu rezerva seguransa sosiál nian, iha montante millaun U$ 347,6.

Presiza nota katak, OJE tinan oin 2024 prevee ho valór millaun U$ 788,2 ba asuntu ekonómiku, millaun U$ 467,1 ba protesaun sosiál, millaun U$ 140,9 ba edukasaun, millaun U$ 66,2 ba saúde no millaun U$ 45,2 ba abitasaun no infraestruturas koletivas.

Rate this item
(0 votes)

Independente Digital TV