Ministru Prezidénsia Konsellu Ministrus, Fidelis Manuel Leite Magalhães hatete, governu aprova projetu rezolusaun ida ba pesoal sira ne’e okupa kargu Prezidente Institutu Públiku (IP) no Empreza Públika (EP) ne’ebé finansia husi estadu.
Tanba, Ministru ne’e dehan, durante ne’e laiha regra salariu ba prezidente IP no EP maibé depende de’it ba negosiasaun.
Ida ne’e, nia hatutan, tanba laiha sistema ida ne’ebé klaru kona-ba salariu kada fula ba ema ne’ebé assume kargu hanesan prezideten IP no EP.
“Ita koko tau mekanismu ida ne’e, ho ida ne’e mak ami propoin defini de’it bazeia ba atribuisaun Orsamentu Jeral Estadu ne’ebé mak entidade ida iha durante tina liman (5) nia laran, bazeia ba ida ne’e ita difine eskalaun,” informa Fidelis hafoin reuniaun Konsellu Ministru (KM) iha palasiu governu, Kuarta (22/03).
Entretantu, tuir Dekretu Lei númeru 92/2022, 22 Dezembru, ne’ebé prevee kona-ba remunerasaun ba titulár órgaun diresaun ba pesoa koletiva sira: 1) Ho despeza média ne’ebé hanesan ka aas liu husi dollar amerikanu millaun $10 mak valór ne’ebé korrespondente ba 90% husi remunerasaun Primeiru Ministru nian; 2) Ho despeza média ne’ebé hanesan ka aas liu husi dollar amerikanu millaun $5 mak valór ne’ebé korrespondente ba 80% husi remunerasaun Primeiru Ministru nian; 3) Ho despeza média ne’ebé hanesan ka aas liu husi dollar amerikanu millaun $1 mak valór ne’ebé korrespondente ba 70% husi remunerasaun Primeiru Ministru nian; no 4) Ho despeza média ne’ebé menus liu husi dollar amerikanu millaun $1 mak valór ne’ebé korrespondente ba 60% husi remunerasaun Primeiru Ministru nian.
