Kazu Hendrique Mate: Tribunal Aplika Aprezentasaun Periodika ba Estudante UNPAZ na’in 16 Featured

By Martinha Gusmão Juñu 25, 2020 1598
Familia lori hela mate-isin Hendrique nebe monu iha andar UNPAZ. Foto INDEPENDENTE Familia lori hela mate-isin Hendrique nebe monu iha andar UNPAZ. Foto INDEPENDENTE

DILI: Tribunal Distrital Dili (TDD) iha interogatoriu dahuluk deside hodi aplika medida koasaun aprezentasaun periodika ba estudante Universidade da Paz (UNPAZ) na’in 16 ne’ebé deskonfia envolve iha kazu konfrontu hodi rezulta Henrique Maia Soares (21) mate.

Ministériu Públiku (MP) promove arguidu na’in 16 ne’e ba krime omisidiu simples ne’ebé previstu iha artigu 138 kodigu penal.

Juiz prosesu hatete, TDD aplika medida koasaun aprezentasaun periodika ne’e tanba prossesu no prova ne’ebé Ministéiru Públiku (MP) aprezenta seidauk hatene loloos motivu husi Henrique nia mate no kazu refere foin iha faze investigasaun nia laran.

Tan ne’e, Juiz hatete, seidauk klaru katak arguidu sira mak envolve duni iha aktu krime hodi rezulta vitima monu husi andar leten. 

Juiz ne’e hatutan, tribunal mós intende deklarasaun husi sasin balun ne’ebé hatete katak vitima mai ho nia maluk ho kondisaun lanu, tanba ne’e bele mos fó perigu ba nia an rasik.

Razaun seluk, Juiz prosesu dehan tan, tribunál nia intendimentu katak arguidu sira nu’udar estudante, tanba ne’e presiza kontinua sira-nia estudu.

Iha fatin hanesan, defeza husi arguidu sira, Jonas Henrique simu desizaun TDD tanba konsidera desizaun refere adekuadu.

“Desizaun husi Tribunál nian ne’e adekuadu ba ha’u-nia kliente sira,” dehan nia iha TDD, Kuarta (24/06).

Iha Domingu (21/06) maizumenus tuku 01.30 madrugada, joven ida ho naran Henrique Maia Soares (21) mate hafoin monu tuun husi andar UNPAZ ne’ebé ho as kuaze metru 12. Hafoin akontesimentu ne’e, komunidade sira ne’ebé hela besik area refere halo asaltu ba estudante UNPAZ ne’ebé rezulta estudante na’in 8 hetan kanek.

Iha versaun rua ba kazu ne’e. Husi parte universidade hatete, joven ne’e monu husi andar leten hafoin nia ho nia maluk sira sa’e ba andar atu halo asaun balun hasoru estudante sira. Enkuantu, parte familia deskonfia estudante UNPAZ balun mak dudu tuun matebian ho naran Hendrique Maia Soares (21) husi andar leten hafoin mosu problema entre nia ho estudante sira.

Rate this item
(0 votes)

Independente Digital TV