Segunda, 27 Setembru 2021 | Login
Jogu Kasino Jogu Kasino

Kasino Ilegál Tolu Halo Operasaun iha Dili Featured

DILI:Governu identifika iha fatin jogu kasino ilegál hamutuk tolu ne’ebé halo operasaun iha Dili. Relasiona ho ida ne’e, autoridade kompetente sira, iha Sábadu (22/4), halo operasaun no buska ba fatin hirak ne’e.

Fatin ne’ebé identifikadu ilegál iha Hudi-Laran, Bebonuk no Timor Plaza. Iha operasaun, autoridade sira mós konsege taka provizoriamente fatin hirak ne’e no kaptura ema ida.

Operasaun ne’e hala’o hafoin autoridade sira ne’ebé kompostu husi Ministériu Interiór, Komandu Jerál Polisia PNTL, Polisia Sientífiku Investigasaun no Kriminál (PSIK), Diresaun Impostu, SERVE no Diresaun Komérsiu no Indústria hetan despaxu husi primeiru ministru.

Antes halo Inspesaun, Sábadu (22/4), tuku 17:30, autoridade sira ne’e halo enkontru iha Kuartél Jerál PNTL, Dili, hodi diskute despaxu ne’e.

Hafoin enkontru, ekipa ne’ebé dirije diretamente husi Ministru Interiór, Longuinhos Monteiro, halo kedas buska ba fatin hirak ne’ebé indetifikadu ona.

Durante prosesu ne’e la'o, Ministru Longuinhos Monteiro hateten, autoridade judisiál halo inspesaun ba jogu kasino tanba ilegál.

“Jogu sira ne’e konsidera ilegál, tanba la prienxe rekizitu kona-ba lei hateten hanesan selu impostu”, dehan nia, iha Timor Plaza.

Inspesaun ne’e halo ho objetivu atu tau regra atu labele hamosu jogu ho tendénsia ilegál iha Estadu ne’e.

Tanba informasaun ne'ebé Governante ne’e simu, jogu kasino ne’ebé hetan inspesaun tanba laiha dokumentu legál.

Tuir nia, empreza sira iha direitu atu loke fila-fali jogu ne’e, maibé tenke iha regra hodi prienxe rekizitu tuir administrativu.

Entretantu, na'in ba jogu kasino iha Timor Plaza no Bebonuk, Frederico Florindo de Jesus ‘Oan-Kiak’ dehan deklarasaun hirak ne’e laiha baze legál.

“Sira husi Diresaun jogu fó tiha karta ba ami, no ami ba tuir ona tenderizasaun, no fó rezultadu katak loron 15 bele halo kompletu tiha, maibé karta seidauk entrega to’o agora Polisia mai grebek ami. Ne’e la loos”, tenik nia.

Nia esplika, durante ne’e kompañia selu taxa ba Estadu, tanba iha dokumentu komprovativu.

Tuir fonte kredivel diáriu ne’e hateten, iha Sábadu (22/4), Polisia kaptura ona Nunu Bai nu’udar responsavel ba jogu kasino iha Hudi-Laran hodi detein durante oras 72 nia laran hodi kontinua ba prosesu investigasaun.

Jogu kasino ne'ebé responsavel husi Frederico Florindo de Jesus nian, sei tau de’it liña polisia (segel) hodi hein dokumentu legál.

Inspesaun ne’e la’o ho di'ak tanba parte rua hetan kooperasaun di'ak maski hamosu lamentasaun uitoan iha terrenu.

Read 1152 times
Rate this item
(0 votes)