Iha tinan ida ne’e, Konsellu Imprensa Timor-Leste (KI) kontinua hala’o konkursu ba Premiu Konsellu Imprensa nian ba kategoria neen, mak hanesan; Premiu Konsellu Imprensa, Premiu Max Sthal, Premiu Adelino Gomes, Premiu Francisco Borja da Costa, Premiu Greg Shackleton, no premiu Bernardino Guterres.
Premiu Konsellu Imprensa oferese ba meiu komunikasaun sosial ne’ebé mak trata ho di’ak-liu direitu baziku traballador jomalista sira-nian, fó atensaun ba sira ninia dezenvolvimentu kareira profisional, no asegura sira-nia independensia no kredibilidade produsaun iha publiku; Premiu Max Sthal fó ba dokumentariu di’ak liu ba asuntu direitus umanus ba radio no televizaun; Premiu Adelino Gomes oferese ba reportajen jornalistika ho lian Portuges di’ak liu; premiu Francisco Borja da Costa fó ba reportajen jornalistiku ba asuntu interese umanu di’ak liu ba kategoria media imprime no online; premiu Greg Shackleton fó ba reportajen jornalistiku ba asuntu interese umanu di’ak liu ba kategoria media eletronika, radio no televizaun; no premiu Bernardino Guterres fó ba foto jurnalistiku di’ak liu.
Atu bele aplika ba premiu hirak ne’e, KI mós kria regulamentu númeru 2/2021, 17 Marsu, ne’ebé públika iha Jornal da Republika, no públika mós regulamentu ne’ebé ho kontiudu hanesan iha sira-nia website iha 22 Juñu 2022.
Ho regulamentu ne’e, iha 22 Juñu to’o 30 Agostu 2022, Konsellu Imprensa hahú loke oportunidade ba media no jornalista sira hodi bele hatama aplikasaun ba kategoria ne’ebé KI estabelese ona.
Hafoin prazu ba aplikasaun ne’e remata, ekipa juri ne’ebé KI estabelese kompostu husi Konseleiru KI na’in tolu mak hanesan Konseleiru Otelio Ote, Expedito Dias Ximenes no Francisco Belo Simões da Costa, no akademiku na’in rua mak hanesan Dulce Martins da Silva no Xisto Viana, hahú avaliasaun ba dokumentus ne’ebé submete.
Husi kategoria neen ne’ebé lansa, iha kategoria haat mak hetan aplikasaun mak hanesan premiu Max Sthal, premiu Francisco Borja da Costa, premiu Greg Shackleton no premiu Bernardino Guterres. Enkuantu premiu tolu seluk la hetan aplikasaun.
Prezidente Painel Juri, Expedito Dias Ximenes hatete, iha tinan ida ne’e jornalista na’in 22 husi televizaun, online, jornál no radio mak aplika ba kategoria haat.
Husi kategoria haat ne’e, ekipa juri deside elimina premiu ba kategoria Max Sthal tanba aplikante ida de’it.
Ho eliminasaun ne’e, ekipa juri avansa ho kategoria premiu tolu no semana ida molok serimonia atribuisaun, ekipa husi Konsellu Imprensa hahú kontaktu jornalista hirak ne’ebé sai manan-nain.
Tuir informasaun husi fontes ne’ebé iha koñesimentu ba prosesu ne’e, KI halo ona kontaktu ba jornalista husi televizaun, jornal no online ne’ebé sai manan-nain ba kategoria premiu Francisco Borja da Costa, Premiu Greg Shackleton, no premiu Bernardino Guterres.
Ba premiu Greg no Bernardino, fonte ne’e hatete, avaliasaun ekipa juri bazeia duni ba kriteria ne’ebé KI estabelese, maibé ba kategoria premi Borja nian KI viola regras tanba fó ba media online ne’ebé la rejistu iha KI.
Tuir regulamentu ne’ebé KI rasik aprova no públika iha Jornal da Repúblika, iha artigu 11 kona-ba Requisitos do Trabalho iha pontu dahuluk hatete “Obra ne’ebé aprezenta iha konkursu tenke original no públika ona iha tinan anterior iha meiu komunikasaun sosial ne’ebé rejistu iha Konsellu Imprensa ka legalmente rekoñesidu iha sira-nia nasaun orijen. (Os trabalhos apresentados a concurso devem ser originais e ter sido publicados ou difundidos no ano civil anterior ao da candidatura através de um meio de comunicação social registado no Conselho de Imprensa ou legalmente reconhecido como tal no seu país de origem).
Iha regra ne’ebé KI rasik públika iha 22 Juñu 2022 ne’ebé asina husi Diretor Ezekutivu KI, Rigoberto Monteiro, iha númeru 4 hatete “Obra ka produtu jornalístiku publika ona iha orgaun no meiu komunikasaun sosiál ne'ebé rejistu iha KI”.
Maske hatuur ona regra ne’e, maibé KI simu no entrega obra husi media online ne’ebé la rejistu iha KI ba ekipa juri hodi halo avaliasaun no ikus mai ekipa juri ne’ebé maioria nu’udar Komisariu KI foti media online refere nu’udar manan-nain.
Desizaun husi KI ne’e ikus mai hamosu protesta husi konkorente balun tanba konsidera KI viola rasik regra ne’ebé sira rasik kria.
Ho protesta ne’e, KI deside elimina manan na’in ba kategoria Francisco Borja da Costa.
"Entaun ami haree fali balun husi juri nian deside média ida ke tuir sira Ezekutivu haree katak rejistu ona (iha KI) maibé seidauk públika iha jornál da repúblika, entaun elimina fali, tanba ne'e mak ohin (horisehik) Konsellu Imprensa fó de'it (premiu) ba (kategoria) rua," dehan Expedito hafoin serimónia atribuisaun premiu iha Balibo, Domingu (17/10).
Tuir kriteria, Expedito esplika, media ne’ebé seidauk rejistu iha KI maske hatama nia produtu jornalistiku maibé labele halo avaliasaun.
Enkuantu, tuir fonte ida ne’ebé hatene prosesu ne’e, media online ne’ebé ekipa juri foti nu’udar manan-nain aprezenta duni ona sira-nia estatutu ba KI hodi bele rejistu, maibé KI pendente tanba sira la’os media públiku maibé media organizasaun no sira lori estatutu organizasaun nian hodi rejistu.
"Failansu tekniku tanba ne'e mak ohin ha'u-nia sujestaun husu par se bele tekniku sira labele hein de'it aplikasaun mai husi jornalista sira maibé sira mós tenke sai ba média sira par esplika kritéria sira ne'e par atu hatama oinsa sira tenke tuun ba média, produtu jornalistika labele hein aplikasaun mais sira mós halo monitoring ba iha jornál, televizaun, radio no online," dehan Espedito.
Kona-ba naran husi media online ne’ebé KI elima, Expedito hatete, ida ne’e nu’udar segredu tanba ne’e labele fó sai.
