Ministru Planeamentu  no Investimentu Estratéjiku ( MPIE) no Prezidente KAFI, Gastão Francisco de Sousa hatete,  konstrusaun monumentu Santa Krúz la'o tempu naruk ona, maibe seidauk konklui, tanba de’it problema iha estatutu.

"Projetu monumentu Santa Krúz paradu, tanba hein MAKLN atu mai aprezenta  iha KAFI, tanba osan adisionál ne'e bo’ot liu. Sira maka tenke aprezenta iha KAFI hodi ita diskute, maibé to’o agora sira seidauk mai aprezenta,” informa Ministru Gastão ba jornalista sira, iha Palásiu Governu, Kuarta (14/01).

Molok ne’e, Ministru Asuntu Kombatentes Libertasaun Nasionál Gil da Costa "Oan Soru" hatete, relasiona ho prosesu monumentu Santa Cruz ne'e, MAKLAN sei ko'alia ho Fundus Infrastrutura atu bele buka solusaun.

“Mais en-prisipiu ami sei ko'alia fali ho Fundus Infrastrutura ba para hodi haree situasaun ida-ne'e para bele fo solusaun, tanba solusaun ne'e buat rua de'it halo ou lae, sé halo karik oinsá?,” Dehan Ministru “Oan Soru” ba Jornalista sira, iha nia kna'ar fatin Komoro, Tersa (13/01).

Nia dehan, tanba Monumentu Santa Krúz nia prosesu dadaun ne'e iha hela Fundus infraestrutura.

"Santa Krúz nia prosesu ida fundus Infrastrutura, Santa Krúz ne'e baibain ita boot sira husu ha'u sempre hatete obra ida santa kruz ne'e todan liu fali povo nia luta ida iha  24 anos ba ukun an  i prosesu sira ne'e hotu, tanba ita rasik kria hela difikuldade sira ne'e,  ne'ebé difikulta tiha pensamentu hotu-hotu,” Kata nia.

Nia informa,  tanba estatua tenke halo iha nasaun Portugál, entaun presiza lori tempu foin to’o Timor-Leste.

 “Ita hanoin halo iha Portugál ne'e hanesan Ainaro ho Dili ba tiha Portugál la kleur infomasaun to'o mai dehan sira iha Portugál la produz estatua ida, estatua ne'e sei ba produz fali iha Xina haruka tiha ba Portugál mak haruka mai fali iha Timor, buat barak tenke iha difikuldade" Nia informa.

Maibé, prontu kuandu prosesu hotu-hotu tenke iha orsamentu, maibé Ministériu Asuntu Kombatentes Libertasaun Nasionál foin simu rekezitus sira ne'e hotu.

"Orsamentu ami foin simu nia rekezitus sira ne'e hodi bainrua ne'ebé ami sei enkontru fila hodi  haree, prosesu sei la'o nafatin, maibé lia oinsá, depois mak ita boot sira mai fali husu, tanba iha tinan ida ba kotuk ne'e prosesu paradu,” Kata nia.