Segunda, 25 Outubru 2021 | Login
Negosiante ikan, Julio Correia, faan hela ikan iha estrada ninin area Largo Lesidere nia oin. Foto:Bernadino/INDEPENDENTE. Negosiante ikan, Julio Correia, faan hela ikan iha estrada ninin area Largo Lesidere nia oin. Foto:Bernadino/INDEPENDENTE.

Husik Rai Moris Fatin, Buka Osan Iha Dili Sustenta Familia Featured

DILI: Foinsa’e ida naran Julio Correia ho idade 23, hela iha Aldeia Samalari, Suku Salari, Munisipiu  Baukau, deside husik hela nia moris fatin, mai iha Kapita Dili buka osan hodi sustenta familia.

Maske, ho idade ne’ebé sei kiik, nia lalakon vontade atu hakas-an hala’o servisu kiik oan, hanesan buka ikan ba faan hodi hetan netik osan uituan, sosa hahan ba tahan kabun oras balun nian.

Bainhira dader sei nakukun nia rona manu lian, nia komesa hader husi toba fatin atu ba lori nia bero hodi tama tasi buka ikan, hafoin ikan barak nia sai husi tasi ba faan.  

“Ha’u buka ikan iha tasi laran hodi mai fa'an iha dalan, hein to’o hotu mak ha’u fila ba uma, dala ruma ema la sosa hotu, entaun ha’u lori fila ba uma".dehan iha area Largo Lesidere, kinta horseik (2309).

Foinsa’e ne’e, moris husi aman Ricardo Correia no inan Alda Correia, sira hamutuk maun-alin na’in neen (6) kompostu husi mane na’in haat (4) no feto na’in rua (2). Julio hanesan oan mane datolu husi mane na’in haat ne’e.

Husi mane sira na’in haat (4) ne’e, remata ona sira nia estudu iha nivel sekundaria, maibé la kontinua ba universidade.

Enkuantu, feto na’in rua (2) dadauk ne’e iha hela nivel sekundaria.

Nia haktuir, la kontinua eskola tanba haree ba nia aman ne’ebé ho idade atinji ona ba idozus, tanba ne’e nia deside hodi ajuda nia aman faan ikan buka osan sustenta familia uma laran.

“Momentu ne'ebá pai mesak mak fa'an ikan, entaun ha’u senti ladun diak tanba ita mós bo’ot ona husi katuas mesak buka osan, entaun ha’u sente ladun diak ha’u tenki sai husi eskola haruka katuas deskansa iha uma, ha’u mak kontinua fa'an fali. atu nune’e ha’u mak buka fali osan ba uma laran,”nia haktuir.

Nia akresenta, durante tinan lima ona nia faan ikan iha estrada ninia area Lesidere nia, maske walikota sempre duni sira bebeik sira, maibé kontinua faan tanba husi faan ikan ne’e mak bele hetan osan.

Nia informa, iha situasaun uluk Governu seidauk implementa serka sanitaria no estadu emerjensia, sira nia rendementu sa’e makas, kada loron bele hetan dolar amerikanu $80 to’o $100, maibé iha situasaun agora halo sira nia rendementu menus, kada loron hetan deit dolar amerikanu $60 to’o $70.

Tuir nia, osan ne’ebé uituan bele sustenta ona familia uma laran no hare mós ba alin sira nia eskola.

Entretantu, Jacob da Silva hanesan mós negosiante ikan iha Lesidere hatete, sira faan husi dader to’o kalan maibé ema la dun sosa sira nia ikan, ho situsaun hanesan ne’e oinsa mak bele sustenta nesesidade uma laran nia.

Nune’e, kada loron sira hetan deit dolar amerikanu $40 to’o $45.

“Tempo agora iha situasaun estadu emerjensia no serka sanitaria, kada loron ami hetan deit dolar amerika $40 to’o $45 ,tanba ikan ne’e laos ami mesak deit faan maibé iha kolega balun faan iha fatin barak entaun ema la dun sosa ami nian,”nia haktuir.

Tanba ne’e, Negosiante sira husu ba Governu atu hadia situasaun rai laran hodi fó oportunidade ba sira, no mós kria kondisaun ida ne’ebé diak no seguru, atu nune’e sira bele faan ho hakmatek.

 

Asistente Editor: Saturnina da Costa

Read 312 times Last modified on Sexta, 24 Setembru 2021 21:32
Rate this item
(0 votes)