Jornal INDEPENDENTE sai manan-nain daruak ba Reportajen Sensivél Jeneru Featured

By Domingos Gomes Maiu 06, 2024 315
Adjuntu Xefe Redasaun Suara Timor Lorosa’e, Germano Sousa (karuk), Xefe Redasaun Jornal INDEPENDENTE, Jorgino dos Santos (klaran), no Xefe Redasaun Neon Metin, Ato 'Lekinawa' Costa (kuanan), hatudu komprimísiu ba kontinuasaun Reportajen Sensível Jéneru, iha serimonia atribuisaun premiu ba manan-nain Reportajen Sensível Jéneru, iha Suai Room, Timor Plaza, Sesta (03/05). FOTO: INDEPENDENTE/Domingos Gomes. Adjuntu Xefe Redasaun Suara Timor Lorosa’e, Germano Sousa (karuk), Xefe Redasaun Jornal INDEPENDENTE, Jorgino dos Santos (klaran), no Xefe Redasaun Neon Metin, Ato 'Lekinawa' Costa (kuanan), hatudu komprimísiu ba kontinuasaun Reportajen Sensível Jéneru, iha serimonia atribuisaun premiu ba manan-nain Reportajen Sensível Jéneru, iha Suai Room, Timor Plaza, Sesta (03/05). FOTO: INDEPENDENTE/Domingos Gomes.

DILI: Dala ida tan, Jornal INDEPENDENTE hetan rekoñesimentu ba ninia obra jornalistiku. Iha loron mundial liberdade imprensa iha 3 Maiu ne’e, Fundasaun Media Development Center atribui premiu manan-nain daruak ba Jornal INDEPENDENTE.

Atribuisaun premiu husi Fundasaun Media Development Center (FMDC) servisu hamutuk ho UN Women, Koica no Konsellu Imprensa, ne’e bazeia ba monitorizasaun no avaliasaun ne’ebé halo ba media neen ba ninia reportajen no públikasaun notisia ne’ebé sensivel ba jeneru.

Diretor FMDC, Francisco Gari informa, atribuisaun premiu ne’e hala’o hafoin ekipa juri halo avalisaun ba media neen durante fulan ida resin, hahú husi 8 Marstu to’o 30 Abril.

Media hirak ne’ebé tama iha avaliasaun mak Suara Timor Lorosa’e (STL), Jornal INDEPENDENTE, Timor Post, Neon Metin, Hatutan, no Tatoli.

“Iha atribuisaun ne’e Jornal STL primeiro lugar, Jornal INDEPENDENTE segundo Lugar, no Online Neon Metin terceiro lugar. Durante fulan ida ita haree media tolu ne’e mak fó espasu ba iha publikasaun sira kona-ba asuntu sensivel ba jeneiru iha Timor-Leste,” dehan Gari ba jornalista sira hafoin serimonia atribuisaun premiu iha ambitu selebrasaun loron mundial liberdade imprensa, iha Suai Room, Timor Plaza, Sesta (03/05).

Atribuisaun premiu ne’e, nia dehan, hanesan mensajen importante ida atu husu ba media no jornalista sira ne'ebé hetan premiu atu enkoraza sira hodi halo reportajen no publikasaun ba notisia sira ne'ebé ligadu ho asuntu sensivel jeneru, kontra esterotipu violensia hasoru feto no labarik feto sira iha Timor-Leste.

“Ita hotu hatene kultura Timor-Leste sei domina patriakal, entaun kultura ne'e mós kontribui ba violensia iha Timor-Leste, tanba ne'e ita haree papel media ne'e importante bele sosializa informasaun ba sosiadade no ukun-nain sira kona-ba asuntu sensivel ba jeneru,” afirma nia.

Aleinde atribuisaun ba media ne’ebé halo reportajen sensivel ba jeneru, FMDC mós atribui premiu ba jornalista na’in tolu ba sira-nia notisia ne’ebé sensivel ba jeneru. Jornalista husi STL sai manan-nain dahuluk, Jornalista Neon Metin sai manan-nain daruak, no Jornalista INDEPENDENTE sai manan-nain datolu.

Entretantu, iha serimonia atribuisaun premiu ne’e, FMDC ho ninia parseiru lansa mós mata-dalan reportajen sensivel ba jeneru.

Xefe misaun UN Women, Amy Nishtha Satyam hatete, mata-dalan reportajen sensivel ba jeneru ne’e oferese orientasaun pratiku hodi halo kobertura kona-ba violensia bazeia ba jeneru ho justu, imparsial, no respeita integridade sobrevivente sira nian.

“Manual ne'e sublina importansia atu haforsa tan lian sobrevivente sira nian, hakotu silensia ne'ebé haleu violensia bazeia ba jeneru, no promove kultura responsabilidade. Ha'u enkoraza organizasaun media sira hotu atu utiliza manual ida ne'e, integra prinsipiu sira iha imi-nia pratika  ba reportajen nian," dehan nia

Inisiativa ida ne'e, nia dehan, hanesan parte ida husi projetu hamutuk ba igualidade ne'ebé jere husi UN Women no finansia husi Koica.

"Ami sente orgullu hodi suporta projetu ida ne'ebé hakonu media ho instrumentu sira halo reportajen sensivel ba jeneru hanesan investimentu ida iha futuru ekuitativu liu. Media iha kbiit atu dezafia estereotipu, hatudu injustisa, promove kultura respeitu no igualidade," Amy hatete.

Rate this item
(0 votes)

Independente Digital TV

Tuir ami iha Twitter

Kalendariu Notisia

« July 2024 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31