Nia dehan, durante tinan 25 CVTL eziste, realiza ona programa lubuk ida, iha teritoriu Timor-Leste, bazeia ba ninia planu estratejiku ne’ebé hola parte no kontribui ba Planu Dezenvolvimentu Estratejiku Timor-Leste tinan 2011-2030 nian.
Nune’e, nia haktuir, programa lubuk ida ne’ebé CVTL halo ona maka, ida CVTL halo mobilizasaun doasaun ran voluntariu liu husi mobiliza doador voluntariu sira atu bele apoiu banku de sangue.
Tanba, hahú iha tinan 2024, CVTL halo ona sosializasaun ba iha teritoriu Timor-Leste tomak ne’ebé konsege atinji benifisiariu hamutuk 1.141 ne’ebé simu ona informasaun kona ba importansia husi ran ne’e rasik atu bele tulun fali ema seluk. Husi numeru benifisiariu na’in 1.141 ne’e iha pursentu 90 maka fó ona sira nia ran.
“Iha tinan 2025 ne’e, CVTL nafatin halo sosializasaun iha territorio laran tomak, benefisiáriu sira ne’ebé maka partisipa iha ita nia sosializasaun ne'e hamutuk 1.342 no husi numéru ne'e to'o agora fulan-juñu nia laran, doador voluntariu sira ne’ebé maka oferese ona ran ne’e hamutuk na'in 529,”dehan nia ba Online INDEPENDENTE, iha nia knar fatin Bairu Formoza, Dili, Kinta (26/06/25).
Sekretariu Jeral Interinu ne’e hatutan, tipu ran ne’ebé CVTL rekolla maka hanesan, O,A, A+, B, B+ no AB, maibé maioria iha tipu ran o.
“Barak liu mak doadores sira mai ho ran tipu O, kada vez ita nia pasiente sira mai ho tipu ran ne’ebé disfisil atu hetan, maibe CVTL koko atu rejolve no kontaktu ba doadores voluntariu sira atu bele apoio ba pasiente ne’ebé presija iha ospital nasional,” tenik nia.
Iha biban ne’e, CVTL mós apela ba sidadaun hotu atu kontribui ran turuk ida ba maluk sira ne’ebé maka presiza tebes ran.
"Ha'u hakarak apela ba públiku katak, ran ne'e importante no ran turuk ida sei salva ema seluk nia moris, tanba ne'e maka ho prezensa CVTL nia voluntariu sira iha imi nia leet, ne’ebé koalia kona ba sosializasaun doasaun ran karik, ita hotu presija tau importasia, atu nune'e ita garantia katak ita nia maluk sira ne’ebé iha problema saude bainhira halo tratamentu presiza ran, ita la difikulta hodi buka doasaun ran, no hakarak apela nafatin katak, doasaun ran la’os deit ba ita nia familia mak ita oferese maibe pelu menus ba ema hotu, tanba karik iha loron ida ita hetan moras ruma, ne’ebé difikulta iha ita nia ran, posibilidade la’os ita nia familia deit mak ajuda maibe ema seluk mos bele salva ita nia moris".
