Sexta, 25 Juñu 2021 | Login
Inundasaun iha kapital Dili. Inundasaun iha kapital Dili.

Inundasaun 4 Abril: Uma Ka’in Afetadu Rihun 25,022, Uma Estragus 4,384, Mate 46 Featured

DILI: Tuir dadus Governu liuhusi Ministériu Statal ba vitima inundasaun impaktu husi anin no udan boot iha teritóriu tomak, iha loron 4 Abril 2021, hatudu total uma ka’in afetadu rihun 25,022, uma ne’ebé estragus 4,384, ema ne’ebé lakon vida hamutuk na’in 46.

“Tuir dadus ne'ebé Governu iha servisu hamutuk ho Ministeriu Estatal hodi rekolla dadus iha Munisipiu 13 ho total uma kain afetadu 25,022, uma ne’ebé hetan estragus ho total hamutuk 4,384, ema ne’ebé lakon vida no lakon hamutuk na’in 46, kompostu husi Munisipiu Dili 22, Ainaro 10, Aileiu 1, Baucau 1, Covalima 2, Viqueque 4, inklui Manatuto 6,”bazeia ba dadus husi pajina ofisial Sekretaria Estadu Protesaun Sivil (SEPS), ne’ebé online Independente asesu, kuarta ohin (14/4).

“Ha’u hakarak pronunsia ba ita bo'ot sira kona-ba saida mak Timor-Leste enfrenta no presiza ba iha kurtu, mediu no longu prazu relasiona ho dezastre naturais ne'ebé akontese ona. Iha aprezentasaun ne'e foku liu ba dezafiu lubuk ida ne’ebé presiza iha sistema alerta sedu molok akontese udan no anin bo'ot,”dehan Sekretariu Estadu Protesaun Sivil (SEPS), Joaquim Gusmão dos Reis Martins, bainhira remata enkontu ho parseiru internasional sira iha Ministériu Finansas, Aitarak laran, Dili, (13/04).

Nia rekoñese, durante inundasaun iha parseiru barak mak fó apoio ona no servisu hamutuk ho ekipa Protesaun sivil nian hodi responde no  halo evakuasaun ba vitima sira lori ba sentru evakuasaun hodi fó asistensia mediku nomós aihan ba vitima inundasaun sira hodi rekopera sira nia saúde.

Nune’e, nasaun doadores sira ne'ebé apoiu ona Timor-Leste hodi ultapasa situasaun ne'e ho fundus mak hanesan, USA - suporta USD.100,000, Xina- suporta USD.100,000, Australia suporta  USD.5.34 milliaun, JAPAN liu husi JICA suporta manta 5,000 no Banku ANZ kontribui USD. 50.000 ba Timor-Leste.

Sorumutu ne’e ho parseiru Internasional sira iha Timor-Leste, organiza husi Ministériu Finansa ho Ministériu Negosiu Estranjeiru no kooperasaun (MNEK), hamutuk ho Sekretario Estado Protesaun Sivil (SEPS) nomós Sekretario Estado Ambiente (SEA).

Governu Timor-Leste fó agradese ba apoiu sira husi parseiru internasional no nasional sira ne’ebé servisu hamutuk ona ho ekipa Protesaun Sivil nian.

 

Jornalista: Saturnina da Costa

Editor: José Sarito Amaral

Read 1116 times
Rate this item
(0 votes)