Tersa ohin (9/6), SEKop Arsenio hato’o relatóriu ikus durante nia mandatu ba Primeiru Ministru Taur Matan Ruak, hafoin nia aprejenta karta rejignasaun iha loron 26 fulan-Maiu 2020, relasiona ho mudansa politika iha VIII Governu Konstitusionál.

Arsenio dehan, sorumutu ne’e Primeiru Ministru maka organiza hodi partilla informasaun kona-ba servisu durante ne’e, maibé nia aproveita lori kedas ho relatóriu ikus, tanba bainhira nia aprejenta karta rejignasaun nia promete atu hatama relatóriu ba Primeiru Ministru.

“Tanba ne’e mak ha’u mai lori kedas ha’u nia relatóriu liuliu relatóriu narativu ne’ebé ha’u prepara durante ne’e liuliu implementasaun programa governu iha tinan 2019 ninia,”Arsenio hateten ba jornalista, hafoin hasoru malu ho Primeiru Ministru.

Hafoin intrega relatóriu ne’e, Arsenio haktuir, Primeiru Ministru mós kontente ho relatóriu ne’ebé hato’o ho detallu tebes ho tékniku.

Eis Diretór ONG Forum ne’e esplika, relata hotu kona-ba durante nia mandatu konsege produz ona produsaun agríkola hamutuk tonelada 600 liu iha timor laran tomak no agora tau hotu ona iha Sentru Kooperativu Multisektorál.

Programa seluk mak, boa-governasaun SEKop iha tinan 2019, oinsá atu halo implementasaun no servisu iha administrasaun sira, no ezekuasaun orsamentu SEKop nian.

Enkuantu SEKop mós rezista ona kooperativa atus ida resin ho kooperativa oioin, no ema ne’ebé envolve koperativa laran ne’e kuaze rihun 100.

Ema ne’ebé involve iha produsaun ne’e mesak timoroan hamutuk rihun 72 iha timor laran tomak, tantu feto no mane.

Tuir Arsenio hatete, iha hasoru malu ne’e laos despedida ida, maibé sei hein membru Governu foun ne’ebé atu troka sira.