Prezidente Institutu Nasional Seguransa Sosial INSS), Longuinhos Armando Leite hatete, Parlamentu Nasional aprova ona orsamentu ba idozo hasa’e ba $50 no parte tekniku prontu atu implementa maibe presiza diploma ruma.
“Ita hanoin katak orsamentu idozu nian, ita nia deputadu sira iha Parlamentu Nasionál aprova ona katak atu hasa’e ba $50, ne’e ami parte tékniku prontu implementa maibé tenke iha diploma ruma. maske iha ona orsamentu maibé ita mós presiza altera lai lei tanba uluk lei ne’e hateten $30 kada fulan ida no agora sa’e ba $50, nune'e tenke altera tiha lai lei ne’e,” dehan nia ba Online Independente iha nia Kna'ar fatin kaikoli, Kuarta ne'e ( 12/1).
"Bainhira iha ona diploma no altera ona lei ne’e, INSS bele ona implementa iha tinan ne’e", nia dehan.
Enkuantu Presidente ne'e husu Governu tenke hare'e no define ona data katak ida-ne’ebé tama ba prestasaun sosiál no ida-ne’ebé mak la tama prestasaun sosiál.
"Ami hanesan tékniku prontu implementa maibé tenke asegura ho lei maske PN aprova no PR promulga tiha ona,” nia informa.
Enkuantu subsídiu apoiu idozu no invalidéz kria hosi dekretu lei 19/2008, 19 juñu, iha tinan 2022 montante $50 kada fulan.
Entretantu Iha fulan-juñu tinan 2021 ne’e idozu no invalidéz territóriu nasionál ne’ebé mak simu apoiu hamutuk 97.717.
Asistente Editor: Saturnina da Costa
