Prezidente Konsellu Administrasaun Institutu Nasional Seguransa Sosial no Fundu Rezerva Seguransa Sosial (INSS-FRSS), Zeferino da Costa Babo esplika katak, bazeia ba lista husi Komisaun Funsaun Publiku (KFP), Funsionariu Públiku (FP) ne’ebé hetan reforma hamutuk 1.985.
“Husi númeru ne’e, na'in 1.420 mak ita verifika hotu ona no hein simu sira-nia direitu. Na'in 565 mak ita sei pendente tanba dokumentus balun la kompletu,” dehan Zeferino ba jornalista sira, iha nia knar-fatin, Kaikoli, Kinta (22/01).
Obstaklu prinsipal ba na’in 656 ne’e mak inklui kaderneta ka konta bankária kopia la moos ne’ebé iha risku transfere sala osan ba konta bankaria seluk.
Ho nune’e, INSS haruka ona ba KFP atu aviza ba funsionáriu sira ne'e hodi kompleta sira-nia dokumentu nune'e bele prosesa.
Eskema pagamentu
Zeferino mós esplika katak pagamentu ba reformadu sira halo liu husi eskema rua, mak liu husi rejime jeral no rejime tranzitoriu.
Rejime tranzitoriu aplikavel ba tempu servisu molok estabele sistema seguransa sosial, husi periodu 20 Maiu 2002 to’o 2017, ne’ebé sai responsavel estadu nian.
“Husi 2017 mai oin tama rejime jerál ne'ebé ita konta sira-nia direitu ne'e la tuun liu husi 50%,” dehan nia.
Kona-ba montante direitu pensaun, Zeferino dehan, ida ne’e depende ba ninia durasaun servisu no ba ninia salariu ne’ebé nia simu bainhira sei ativu.
Entrentantu, INSS garante katak pagamentu pensaun sei halo kada fulan to’o benefisiariu lakon vida, ho mekanizmu transferensia liu husi banku. Ba pagamentu ne’e, INSS aloka ona orsamentu $451.976,53.
