Inan-aman Pozitivu ‘Lalin’ Oan ba Izolamentu Featured

By Gloria Maia Marsu 30, 2021 589
Positive Covid-19. Positive Covid-19.

DILI: Tuir dadus husi Ministériu Saúde, labarik ho idade menus husi tinan 6 hamutuk na’in 22 ne’ebé la hetan daet husi Covid-19 tama hotu izolamentu, tanba labarik sira ne’e labele dook husi sira-nia inan-aman ne’ebé pozitivu.

Koordenador Pilar VII Covid-19, Nilton do Carmo hatete, pasiente pozitivu Covid-19 iha izolamentu Tasi Tolu hamutuk na’in 150. Husi númeru ne’e balun tama ho nia oan.

“Pasiente balun mai ho labarik kiik (oan) ne’ebé menus husi tinan 6 hamutuk hamutuk 22, sira ne’e lakohi dook husi inan-aman,” informa nia iha izolamentu Tasi Tolu, Tersa (30/03).

Nia hatete, pasiente ne’ebé izola iha izolanentu Tasi-Tolu kuaze mai ho kazu lizeiru, tanba ne’e la presiza iha tratamentu ne’ebé seriu, maibé tenke izola nunee virus labele transmite ba ema seluk.

“Sira ne’e mai ita izola de’it atu pasiente labele transmite ba ema neebé mak nia besik, ida ne’e mak ita izola sira, atu nunee bainhira ninia virus ne’e lakon ona husi nia an mak bele reintrega fila fali nia,” dehan Nilton.

Iha fatin hanesan, pasiente rekoperadu husi aldeia 4 de Setembru ne’ebé tama izolamentu iha 11 Marsu, Domingos Savio Sarmento sente haksolok tanba durante loron 20 nia laran pessoal saúde halo atendimentu di’ak tebes.

“Tuir saida mak ha’u haree iha ne’e sira fó atendimentu ne’ebé di’ak tebes mai ami pasiente sira, sira mós fó ami vitamina C ami hemu kada loron, atu nunee ami-nia imunidade ne’e kontinua sa’e,” dehan nia.

Pasiente rekoperadu ne’e mós fó sasin katak, durante iha izolamentu iha pasiente balun ne’ebé hatudu sintoma balun.

“Kolega balun la sente aimanas ninia manas, la sente masin nia mer, maibé depois pasiente ne’e rasik halo ezersisiu rutina no hetan tratamentu di’ak, deskansa di’ak, ikus rekoperadu,” dehan nia.

Tuir nia, Covid-19 ne’e hanesan moras ne’ebé simples tebes, importante mak tenke halo tuir protokolu ne’ebé mak Ministériu Saúde hatur ona.

“Ha’u hanoin, ekipa saúde foti pasiente ne’ebé detetadu pozitivu evakua kedas ba iha sala izolamentu ne’e prevensaun ne’ebé di’ak tebes, atu nunee virus ne’e labele daet ba iha ema seluk,” katak nia.

Entretantu, sala iha izolamentu Tasi-Tolu fahe ba grupu 3. Grupu dahuluk ho kama 54, grupu daruak ho kama 55, no grupu datoluk ho kama 170. Husi total kama 274 ne’ebé iha, hela kama 13 mak seidauk okupa.

Iha izolamentu refere, iha haris-fatin 9 ne’ebé fahe ba mane no feto, iha mós haris-fatin ida ne’ebé iha hela prosesu reabilitasaun.

Ba pessoal saúde ne’ebé halo atendimentu hamutuk na’in 6, kompostu husi médiku na’in ida no enfermeiru na’in 5.

Jornlista: Gloria Maia
Editor: Jorjino dos Santos

Rate this item
(0 votes)
Last modified on Kuarta, 31 Marsu 2021 11:53

Independente Digital TV