HNGV: Laiha bebé mate iha ICU Pediatria tanba problema Aimoruk Featured

By Ekipa INDEPENDENTE Juñu 13, 2024 579
Foto:Dok/INDEPENDENTE. Foto:Dok/INDEPENDENTE.

DILI: Hospital Nasionál Guido Valadares rekuza informasaun balun ne’ebé espaila iha media sosial kona-ba bebé ne’ebé mate iha ICU Pediatria tanba problema menus aimoruk.

Diretór Servisu Apoiu Diagnotiku no Terapiotika, HNGV, Vidal de Jesus Lopes hatete, laiha bebé ida mak mate iha ICU pediatria tanba kauza husi problema aimoruk.

"Ha'u foin komunika ho parte Departamentu katak informasaun ne'e la loos, tanba ida ne'e la akontese iha sala pediatria," dehan Vidal iha HNGV, Kuarta (12/06).

Nia rekoñese iha duni aimoruk balun ba labarik sira ne’ebé falta, maibé sira buka ona solusaun, katak bainhira aimoruk ida laiha bele responde fali ho aimoruk seluk.

Tuir nia, kazu balun kona-ba bebé mate iha HNGV transfere husi ospital referal no sentru saude sira.

“Halo atendimentu iha ospital referal sira labele ona, entaun haruka mai iha HNGV, balun problema fuan, respiratoriu no seluk tan,” dehan nia.

Iha fatin ketak, deputada bankada Fretilin, Nurima Ribeiro Alkatiri hatete, bankada Fretilin iha preokupasaun boot, tanba tuir informasaun ne'ebé nia simu katak situasuan iha HNGV sei sai a'at liu tan, tanba seidauk iha solusaun atu bele grante katak sei bele rezolve problema aimoruk.

Molok ne’e, Nurima dehan, bankada Fretilin avizu beibeik ona katak problema aimoruk sei akontese no daudauk ne'e akontese no afeita povu.

"Iha HNGV faktores barak, tanba orsamentu 2024 aloka ne'e la sufisiente, tuir duni diresaun INFPM nia esplikasaun, loloos $12 Milloes ba tinan ida ne'e, maibé aloka de'it mak $4,3 milloes. Entaun HNGV iha orsamentu ba emerjénsia katak aimoruk bele sosa, maibé orsamentu ne'e mós laiha tiha ona, tanba ita tama ba krize boot," dehan nia.

Rate this item
(0 votes)
Last modified on Kinta, 13 Juñu 2024 15:39

Independente Digital TV