Diretor Servisu Saúde Munispiu Lautem, Bernado  Amaral Lopes hatete, iha 16 Marsu 2021 joven na’in 16 uza motor hodi halai sai husi Dili ba Lautem.

“Sira mai duni horisehik, 16 Marsu, maibé bainhira sira mai ita persiza konsidera sira-nia razaun, tanba sira deklara sira hanesan estudante ne’ebé hela iha kos, tanba durante serka sanitaria sira-nia hahan hahú laiha ona, no sira buka dalan halai sai ba sira-nia inan-aman,” dehan Bernado via telefone, Kuarta (17/03).

Hafoin to’o iha Lautem, nia hatete, parte saúde munisipal foti ona sira-nia amostra no sei haruka ba Laboratoriu Nasionál hodi halo teste.

Komandante PNTL Munisipiu Lautem Superintendente Antonio Rego Fernades dehan, sira mai husi Dili laiha karta autorizasaun husi SIJK.

Tuir informasaun, nia dehan, sira mai husi Metinaro liu husi Laklo ba Manatuto, Baukau, no kontinua viajen ba Lautem.

“Husi Parte PNTL identifika joven na’in 16 mak mai iha Lautem, sira kuaze mesak estudante hotu,” dehan Antonio via telefone.

Entretantu, Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo hatete, sidadaun na’in 16 halo movimentu husi Dili ba Lautem la ho autorizasaun husi Sentru Integradu ba Jestaun Krize (SIJK).

“Husi Munispiu Lautem mós relata  katak horiseik iha ema na’in 16 ne’ebé fila ba Lautem la lori autorizasaun espesial husi SIJK no liu husi dalan terik Metinaro-Lakló,” dehan Rui liu husi video konferensi, Kuarta (17/03).

Tuir Rui hahalok ne’ebé ema na’in 16 ne’e halo fó risku atu hada’et tutan Covid-19 ba munisipiu seluk.

Jornalista: Gloria Maia

Editor: Jorjino dos Santos