Sekretáriu Estadu Asuntu Toponímia no Organizasaun Urbanu, Germano Santa Brites Dias hatete, Governu hala’o vizita ba iha Kompañia Caltech atu haree direita servisu kompañia ne’e nian no ba futuru atu servisu hamutuk hodi bele solusiona problema lixu iha Kapital Dili.
“iha asuntu balun ne’ebé koalia hamutuk entre Autoridade Nasional Petroleu, Ministeriu Administrasaun Estatal, no mós liña ministerial sira hotu, para haree problema boot ida ne’ebé maka Timor-Leste hasoru, liliu lixu ne’ebé ita nia populasaun sira soe arbiru iha Estrada publiku, valeta no mós mota laran sira. Tanba ne'e mak vizita ida ohin mai Caltex ne'e, ho objetivu ida atu hare oinsa Caltech nia servisu ba hare'e liu ba lixu, entaun governu hare'e hela ida ne'e ba futuru ne'e servisu hamutuk ho Caltech atu nune'e rekolla lixu sira iha Dili laran atu bele produs sai pavimentu no triplex,”dehan nia ba Jornalista sira iha resintu Kompañia Caltech, Beduku, Suku Komoro, Dili, Tersa (24/06/25).
Tuir Governante ne’e dehan, traballadór sira iha Kompañia Caltech iha esperensia ne’ebé diak, tanba ne’e husu atu kontinua servisu diak ho Governu sentral atu bele resolve problema lixu.
“Ohin mai vizita Kompañia Caltech ne'e ami mos haree saida mak sira produz no mos funsionariu sira lori ami ou aprezentasaun balun ne'ebe mak funsionariu sira aprezenta ami hare'e, tamba ne'e mak servisu bo'ot ne'ebe futuru sei mai liu husi Autoridade Nasional Petroliu Minerais no apoio tomak hela para atu resolve,”tenik nia.
Iha fatin hanesan, Jerente Operasional Kompañia Caltech Rogerio Ornai hateten, ho vizita ne’e, Governu bele haree direita servisu no fasilidade sira ne’ebé iha kompañia refere.
Nia dehan, kona ba resiklajen ne'e, sira hahú ona iha tinan lima liu ba, maibé ho kuantidade ne’ebé naton, maibé agora sira iha kapasidade atu hasa’e liliu kona ba resiklajen sai fila fali produtu ne'ebé bele uza ba konstrusaun nia hanesan pavimentu ho triplex, ne’ebé sira produs mais menus toneladas 3 kada loron.
“Produtu ne'ebé maka ami halo nia materia prima mak plastiku no plastiku ami kahur no agora dadauk iha tipu rua, tipu ida bolu pavimentu ne'e ami uza ba halo trotoar no dalan ninin sira, tipu ida mak triplex ho plastiku,”dehan Jerente ne’e.
Nia esplika, ba prosesu produsaun pavimentu ne’e, nia misturasaun maka plastiku ho plastiku, plastiku ho rai-henek, plastiku ho botir no surat tahan no mós rai-henek sira troka ho botir rahun, nia produtu pavimentu ne'e sai 100% sai resiklajen.
Entretantu, produtu ne’e, Kompañia exporta ona ba iha Nasaun Amerika, Kanada, Australia no ninia sampel kompañia haruka ona ba iha nasaun Swedia.
