Tuir Ministru Obras públika (MOP), Abel Pires, hateten, vitima inundasaun uma kain 2.000 ne’ebé seidauk hetan apoiu rekuperasaun, dadaun ne’e, ekipa MOP halo ona konsultasaun ho populasaun sira iha Hera.
Nune’e, Governu bele harii bairu foun ba vitima inundasaun sira iha fatin refere.
Tanba ne’e, Governante ne’e dehan, dezeñu ba konstrusaun refere agora dadauk pronto ona.
“Iha Ministériu nian dezeñu ne’e prontu ona, agora hein tan konsultór mai, para haree apoiu liután, ne’e ita bele halo konstrusaun. Mais, ne’e tenke iha konkursu públiku, tanba ita hakarak halo mekanizmu entre Governu ho entidade privadu," dehan nia ba Jornalista sira iha Palasiu Governu, kuarta foin lalais, (27/04).
Ho nune’e, Ministru ne’e, garante Governu sei implementa programa ne’e iha tinan ida ne’e nia laran.
Entretantu, tuir dadus husi Sekretariu Estadu Protesaun Sivil (SEPS), total vitima inundasaun 4 abril 2021, iha teritoriu laran tomak hamutuk 25,0222, uma ne’ebé hetan estragus total hamutuk 4,384 ema ne’ebé lakon vida iha na’in 46.
Enkuantu, total familia uma kain ne’ebé Governu presiza atu fó apoiu material rekuperasaun hamutuk 5.000.
Husi númeru ne’e, Governu apoia uluk ona material rekuperasaun ba familia vitima hamutuk 3.000 no hela 2.000 mak seidauk hetan apoiu.
Tanba ne’e mak, Governu planu atu harii bairu foun ba sira iha Postu Administrativu Hera.
