Governu Prolonga Serka Sanitária Iha Munisipiu Tolu Featured

By Saturnina da Costa Abril 01, 2021 1687
Ministru Prezidensia Konsellu Ministru, Fidelis Leite Magalhãens. Ministru Prezidensia Konsellu Ministru, Fidelis Leite Magalhãens.

DILI:Governu liuhusi Konsellu Ministru (KM), deside prolonga serka sanitária iha munisipiu Dili ba loron 14 no ba munisipiu Baucau no Vikeke aumenta tan loron 7.

Tuir Ministru Prezidensia Konsellu Ministru, Fidelis Leite Magalhãens hatete, Konsellu Ministru aprova ona rezolusaun Governu ba impozisaun serka sanitária no konfinamentu domisiliariu jerál ba populasaun sira iha munisipiu Dili hahú oras 00:00 loron 3 fulan abril to’o oras 23:59 loron loron 17 fulan abril, no ba munisipiu Baucau no Vikeke hahú oras 00:00 loron 2 abril to’o loron 10 fulan abril tinan 2021.

“Impozisaun serka sanitária iha munisipiu Dili prolonga tan loron 14 no ba Munisipiu Baucau no Vikeke aumenta loron 7 tan,” dehan nia iha konferensia imprensa iha Palasiu Governu, (01/04).

Governante ne’e mós nafatin apela ba komunidade sira iha kapital Dili, Baucau no Vikeke mantein regras hotu ne’ebé define ona iha rezolusaun anterior ne’ebé impoin ona serka sanitária sira no  konfinamentu domilisiariu iha munispiu sira ne’e.

Nune’e kontinua bandu sirkulasaun ema entre munisipiu sira ne’e no iha munisipiu seluk, exetu ba razaun sira ne’ebé antes ne’e define ona, liu-liu razaun sira ba saúde publika, ba servisu esensial no nesesidade ne’ebé presiza tebes.  

Molok ne’e, segundu serka sanitária iha Munisipiu Dili hahú iha loron 15 fulan-Marsu too 2 fulan-Abril 2021. Enkuantu iha Munisipiu Baucau no Vikeke hahú iha loron 29 Marsu too loron 2 Abril 2021. Tanba ne’e serka sanitária iha Munisipiu tolu ne’e sei remata iha loron Sesta aban, 2 Abril, oras 23:59 (kalan).

Entretantu, prolongasaun serka sanitária ne’e bazeia ba alterasaun projetu Dekretu Governu nian, aprezenta husi Primeiru-Ministru, Taur Matan Ruak, kona-ba medidas ezekusaun Deklarasaun Estadu Emerjénsia, ne’ebé efetua husi Dekretu Prezidente Repúblika nu. 17/2021, loron 31 fulan-marsu, hodi hatán ba pandemia COVID-19.

Prezidente Repúblika, Francisco Guterres Lú Olo, iha 31 marsu 2021, dekreta estadu emerjénsia dasanuluk-resin-rua ba loron loron tolu-nulu (30), hahú husi tuku 00.00 iha  3 abril 2021 no termina iha tuku 23.59 iha 2 maiu 2021, iha territóriu nasionál tomak.

Xefe Estadu dekreta Estadu Emerjénsia hafoin pedidu estensaun aprova iha Parlamentu Nasionál, kuarta horsehik (31/3), ho votus-a favor 49, kontra 0 no abstensoins 14.

Tuir dadus Covid-19 iha Timor-Leste, Dili sei sai numeru dahuluk na'in 456, Baucau na'in 26. Tanba ne’e dadus Kuarta horsehik (31/3) kazu jerál, rekuperadu na’in 8 no kazu ativu ne’ebé baixa iha sala izolamentu na’in 415.

 

Jornalista: Saturnina da Costa

Editor: Jose Sarito Amaral

Rate this item
(0 votes)

Independente Digital TV