“Governu iha ona Planu atu harri sentru akollamentu temporariu ba Vitima insendio iha eis-merkadu Comoro, bainhira sentru akollamentu ne’e konstruiu hotu ona mak Governu liu husi Ministeriu Planu Ordenamentu sei koordena fatin ba sira ne'ebe sai vitima no sei persija iha solusaun ba problema sosial ne'ebé ita nia populasaun sira hasoru,”dehan nia ba jornalista sira iha Palasiu Governu kuarta horseik (04/08).
Nune’e, bainhira atu aloka fatin ba populasaun refere tenki iha altenativu ida mak, halo prepara uluk sentru akollamentu temporariu ba sira.
Enkuantu, tuir dadus provizoriu vitima insendiu ne’ebé akontese iha loron 29 fulan-Jullu tinan 2021, uma kain 208 husi xefe familia 972 mak afeitadu.
Ho nune’e, Governu liu husi Protesaun Sivil, MSSI, MS no mós sidadaun individu balun apoia ona material konstrusaun no nesesidade bazika ba vitima sira.
Entratantu, iha sorin seluk, Xefe Suku Fatuhada, Marselino Soares hatete, nia parte prekupa ho desizaun Governu nia ne’ebé apoia ona material konstrusaun ba vitima 209 iha eis-merkadu Comoro.
“Governu hakarak atu fó apoia ba ema sira ne’e tenki identifika halo didiak, sira ne’ebé nia kartaun eleitoral laos Dili, ita tenki rekomenda ba sira fó material no aihan emerjensia atu sira fila ba nia hela fatin,”Marselino informa.
Tanba ne’e, nia sujere ba Governu atu identifika kartaun eleitoral vitima sira nian ne’ebé laos kartaun eleitoral Dili, tenki fila ba munisipiu, antes fó apoia hodi evita risku husi Governu.
Asistente Editor: Saturnina da Costa
